Zarhhnih chungah inn 4,000 leng a kaang: Data for Myanmar
Post staff | 2022 February 16 — Sagaing le Magway ramṭhen, Chin le Kayah (Karenni) ramkulh hna ah February 1 in 14 tiang ah inn 4,479 leng ralhrang hna nih an khangh cang tiah ramkhel lei, raltuknak nih a chuahpi pawl kherhlainak a tuahtu phu Data for Myanmar nih February 14 ah thawng an thanh.
Sagaing ramṭhen hi inn 2,567 in a tam bik a kaang mi si. Chin ramkulh hi inn 976 in pahnihnak a kangh tambik a si. Magway ramṭhen ah inn 626 in pathumnak a si i Kayah (Karenni) ramkulh ah inn 310 in pali nak a si. A zaapi tein inn 4,479 a kaang mi an si.
Sagaing ramṭhen ah peng 37 a ummi chungin Pale, Mingin, Taze, Kalay, Ayadaw, Kanbalu, Shwebo, Ye-U, Kani, Yinmapin, Myaung, Khin-U, Tabayin, Kyunhla, Wetlet, Kawlin, Chaung-U hna khua 14 hi mei khangh an tong.
Magway ramṭhen ahcun, ralhrang a doh zungzaltu Gankaw, Pauk, Myaing, Yesacu, Htilin peng hna i khua pawl zong khangh piak an tong tiah Data for Myanmar phu nih an chim.
Magway ramṭhen, Gankaw peng, Hnankha khua ah kum 35 a simi pa cu a pupa ro a simi inn te an khangh piak caah a ngeihchiat tuknak kong le eidin a hartuk nak kong RFA ah a chim.
“Ka kir ahcun ka inn cu vutcaam ah aa rak cang cang. Ting 500 man hrawng ka sung lai. Ka inn pawng i a kaang lomi buk ah ka um. Mah ka zawn i a taangmi eiawk kha ka ei tawn. Ralzaam caah bomhnak tete kha rinh in ka ei tawn,” tiah a chim.
Hnankha khua hi hramhram uknak an lak hnu in voi (5)nak an khangh a si cang tiah an ti.
2021 May thla dongh lei khan mei khangh hram an thok i November le December thla hrawngah a zual deuh le 2022 February thla cu a zual bik a si zong Data for myanmar nih a langhter.
Sagaing ramthen, Pale khuanu pakhat zong an in khangh a ton caah rawl chuannak bel hmanh a taang lo tiah a chim.
PDF a bawmtu khua pawl, bom puah hnawh an tonnak khua pawng pawl le Pyu Saw Htee pawl nih thawngpawng an peknak khua pawl cu cu ralhrang nih ral khun in an khangh piak hna tiah khuami nih an chim.
Nain, Major- General Zaw Min Htun nih cun kanmah nih kan khanghmi si loin PDF nih an khanghmi a si tiah a chim.
PDF hramtlai pakhat nih cun kan ram le kan vawlei hi kanmah tein kan i runven a hau timi hmuitinh a um caah khanghnak ding a sullam hrim um lo tiah a chim.
Data for Myanmar nih 2021 February 1 in 2022 January 5 chungah Chin, Kayah, Magway le Sagaing hna telh in ramṭhen le peng (9) chung i khua 90 ah inn 1963 khangh a si tiah January 6 ah a voikhatnak a thanh.
Atu February 14 a voi (2) nak a thanhmi ah inn 4479 khangh a si tiah a thanh ṭhan. A voihnih thanhmi fonh in hramhram uknak lak kum 1 chungah inn 6442 khangh a si.#
About The Author
