Zeiruang Ah Dah President Hlun U Thein Sein Nih Tuluk Ramleng Minister A Ton?

0

City Hunter| 2018 April 25| President hlun U Thein Sein nih Tuluk Ramleng Minister Wang Yi cu Beijin khualipi, April 22 ah a ton tiah Tuluk Ramleng ministry zung nih an thanh. Zeiruang ah dah U Thein Sein nih Tuluk Ramleng Minister hi a ton?

Tuluk-Myanmar ramhnih kar ah tuahmi sipuazi Singyan lam simanking thanchonak caah pehzulh in kaa zuam lai tiah Tuluk Ramleng Minister Wang Yi nih U Thein Sein he ton biaruahnak an ngeih lio a chim tiah Beijin khuami thawnglatu hna nih an chim.

Tuluk nih biapi taktak i kan chiahmi lam pakhat simanking chung ah Myanmar he aa pehtlaimi tlanglawng lam, motor lam le tilawng dinhhmun saknak pawl ah hmual ngei ngai in hlawhtlinnak a hmu i pehzulh in kan tuanchuah rih lai tiah Mr. Wang Yi nihcun a chim.

Myanmar ram sipuazi thanchonak le ramchung remdaihnak lamthluan ah Tuluk nih thazaang nan chuahnak le nan kan bawmhmi cung ah kan i lawm tiah U Thein Sein a chim tiah Tuluk Ramleng Ministry zung thawngthanhnak tuahmi ning in theih a si.

Myanmar ramchung ah a biapi in a thawng ngaimi dohkalhtu USDP party lutlai pakhat sinak in auh le i tonnnak an ngeih a si lai ti an ruahdamhmi pawl cu party in chimnak nawlngeitu Dr. Nandar Hla Myint nih a al.

President Xi Jinping i ramleng policy zoh tikah Myanmar cozah he i pehtlaihnak thanchoter lawng si lo in zatlang mibu hna he zong a lam phunkip in pehtlaihnak a thattermi pawl hmuh khawh an si.

Tuluk-Myanmar pehtlaihnak kong thiamsang Dr. Hla Kyaw Zaw nihcun President hlun U Thein Sein Tuluk cozah nih an sawm le bia an ruahmi hi acozah le USDP karah pehtlaihnak a tuahtu Tuluk cozah nih a lam phunkip in pehtlaihnak that aa zuammi a si kho tiah a ruahdamh.

U Thein Sein President tuanvo a laak lio ah ramchung dohkalhnak le fakpi soiselnak a tongmi Irrawaddy Mitsone Dam simanking an ngoltermi phun in Tuluk i chawphumnak a tuahmi pakhat an khammi pawl hmuh khawh a si.

Asinain Tuluk leikap nih an thanhchuahmi ahcun Mitsone simanking kong an chimrelmi a um lo i Tuluk cozah i hawikom tha pakhat dirhmun in U Thein Sein tonbiaruahnak kan ngeih a si tiah an chimphuan.

2015 thimnak tuah hlan zong ah Daw Aung San Suu Kyi cu Tuluk cozah nih an sawm i rampi level khual dirhmun in an rak don, an rak chawnhbiak ko tiah theih a si.
Ref: BBC Burmese

About The Author

Na ruahning rak langhter ve.. (Leave a comment)

%d bloggers like this: