Zeiruang Ah Dah Siangbawite Chinram An Luh Ni Le Vice President Kan Hmuh Ni Aa Khah?

Salai Holy Tawk Tling Thang| 2018 March 15 | 2016 March 15 cu Kawlram ramkomhpi le rammi nih philh awk tha lo in President thar thimnak in tuanbia thar kan tial ni a si. Kawlram tuanbia ah Chin miphun le Khrihfa in a hmasa bik Vice President in tuanbia thar a kan tialpiaktu cu Major Henry Van Thio a si. Cun, Chin miphun in Kawlram uktu le hruainak rian sang bik a kan tuanpiak hmasatu zong a si fawn.

Amah hi Chin miphun le Khrihfa a simi paoh nih a hlankan in Vice President dirhmun a phan lai ti hi aho hmanh nih kan ruat lo. Vice President tiang a phan lai ti kan lungkil hmanh in kan ruah lomi Vice President-2 a kan hmuhpiakmi cung ah Chin miphun dihlak nih kan lawmhpi, kan i uarthlanpi cio. I lawmh lo awk tha lo in Chin mizapi dihlak kan lungthin a kan tongh. Zei ruang ti ahcun Vice President Henry Van Thio nih kapthum in tuanbia dawh a kan tialpiak. Kawlram ah Khrihfa in a hmasa bik Vice President a si. Chin miphun ah a hmasa bik Vice President a tuanmi a si fawn. Chin miphun lakah a hmasa bik rian sang bik a tuanmi a si. Cucaah, Chin miphun, Khrihfa mi le Kawlram miphun vialte caah 2016 March 15 ni cu philh awk a tha lomi tuanbia dawh le tuanbia thar tial ni a si.

A hram thawk ahcun March 17 ah thimding in bia an rak chah nain zei ruang ah dah March 15 ni thengte ah Kawlram President thim le Chin miphun nih tuanbia thar kan tial ni a si hnga?

Vice President Henry Van Thio Hakha a tlun lio

Chinram le Chin miphun cu a nungmi PATHIAN nih a thimhleimi ram le miphun kan si. PATHIAN nih Carson Siangbawipa Rev. Arthur E. Carson le siangbawinu Laura H. Carson nupa cu a ramkauhnak ding ah Chinram ah a hun hruai hna. Anmah siangbawite thawng in Chin miphun cu Khrihfa kan si. Anmah an phak hnu in ca zong kan ngei. PATHIAN lam hruainak le siangbawite riantuannak thawng in zan bang a muimi Chinram cu nikhat hnu nikhat in a hung ceu cang i Chinram ah zatuak 98% hrawng zumtu, Khrihfa kan si cang.

Siangbawi- Carson le Laura

PATHIAN lam hruainak thawng in Carson Siangbawite a hmasa bik Chinram-Hakha an phak ni cu 1899 March 15 ah a si. Cu bantuk in Kawlram President thim ni le Chin miphun le Khrihfa mi nih tuanbia thar kan tial ni zong 2016 March 15 thengtheng te ah a si ve. Zei ruang ah dah Carson siangbawite Chinram, Hakha an phak ni le Chin miphun nih Vice President kan hmuh ni thengte hi aa khah hnga? Na ruat bal ve maw?

Chin miphun hi PATHIAN nih a thar in sersiam le thluachuah pek a kan duh caah a si ko hnga lo maw? Zei ruang ah dah NLD haotu- Daw Aung San Suu Kyi nih Chin MP Major Henry Van Thio theng hi Vice President caah a kan thimpiak hnga? Chin miphun le Chinram cawisangtu ding ah NLD upa le Suu Kyi thinlung ah PATHIAN nih rian a tuan bia a si lo tiah aho dah a chim kho lai?

Vice President Henry Van Thio le a chungkhar

Khuaruahhar pakhat a si rihmi cu Vice President-2 theng a hmuhmi hi a si. Vice President-2 nih a tuandingmi rian suttung cu ngandamnak, fimcawnnak, lentecelhnak, thawngthanhnak, nunphung lei, riantuannak lei, nun khuasaknak lei, hmunhma peknak lei, zuatkhalhnak le cinthlaknak lei, sohlohzi lei le a donghnak bik ah a biapi tukmi biaknak lei kongkau a si. Hi zawn ah zeidang vialte nakin i uanthlar awk taktak a simi cu biaknak lei kongkau amah nih a tlaihmi hi a si.

Vice President Henry Van Thio hi zei bantuk dirhmun le sining in thimmi a va si zong ah Kawlram le a hlei in Chin miphun sersiamnak caah ngandamnak le fimnak he PATHIAN nih a nun lam hruai chinchin ko seh. Nihin ah amah aa zuamnak le riantuannak thawng in Chinram le Myanmar ram tampi a thanchoter manh cang.

Kum 68 renglo chung Chin miphun le tlangcung miphun nih biaknak kongkau ah namnehnak kan tonmi le miphun hme kan simi cung ah thleidannak le covo buarpiak kan tonmi siseh, tlangcung hriamtlai le rammi vialte nih kan duhmi a dikfelmi remdaihnak le federal ramkulh kan hmuhnak ding ah siseh Kawlram ramkulh le ramthen vialte lakah fimcawnnak result chia bik le sifak bik ramkulh in kan luat khawhnak ding rian a kan tuanpiaktu Vice President si hraam seh. Cu vialte nikhat hnu nikhat, kumkhat hnu kumkhat a tlin khawhnak ding ah PATHIAN nih ngandamnak le riantuan khawhnak thluachuah pe chinchin ko seh.

Tlangcungmi le Chinmi vialte zong nih amah pumpak sining le dirhmun zoh i cuai a thlaitu si lo in a tanpitu le thazaang a pe khotu si khawh i zuam chin lengmang rih hna usih.

Rammui le khuaci mui a simi Chinram a ceutertu Carson siangbawite Chinram- Hakha an phak ni le tuanbia an tial ni cu March 15 a si. Cu bantuk in Chin miphun le Khrihfa nih Vice President in tuanbia kan tial ni zong March 15 a si ve. Cucu, PATHIAN nih a thimmi Chinram le Chin miphun hi sersiam le thluachuah nganpi pek a kan duh cang caah a si kho? A pek zong a kan pek thliahmah ko tiah ka ruah. Cucaah, Kawlram le Chin miphun nih March 15 ah tuanbia thar kan tialmi nih a dikmi thlennak le thanchonak ni bang tlanter chinchin ko cang seh! +++

Catialtu: Salai Holy Tawk Tling Thang

Ref: TCP-Vol.4, No.193| 2016 March 17|

Leave a Commnet

%d bloggers like this: