Zinghmuh Tlang National Park Chung Lai Tidil Rian Pehzulh In An Tuan Lai
Minister Mang Hen Dal
Salai Elvis| 2018 November 22| Zinghmuh tlang Lai Tidil cu zoh dawhmi le Dum (park) pakhat siding in timhtuah mi rian cu pawngkam zeihmanh hnursuang lo dingin riantuan kan pehzulh lai tiah Chin ramkulh Thingram lei zohkhenhnak Minister Pu Mang Hen Dal nih a chim.
“Hi kongah Chief Minister tel in khuami hna voithum li tonnak le chimhruahnak kan ngeih cang hna. Asinain, cheukhat nih an duh lo, duh lonak langhter an timh tiah thawngpang kan theih. Kan i timhmi chungah mizapi harnak pe hna seh ti cu kan tinhmi a si lo. Mah nak tha le thanchoter ding kan i tinhmi tu a si deuh. Hi kongah rampi thingram zohkhenhnak lei nih National park ah kan ser cang ti zong a si rih lo, i tinhmi tiang lawng a si rih. Pehzulh te ding khi a si rih. Cu tikah khuami hna nih cinthlaknak le zuatkhalhnak caah an duh ah cun hika zawn cu kan zuahpiak u ti caan tha/rem a um rih” tiah Minister Pu Mang Hen Dal nih November 19 ah a chim.
Hi National Park tuahnak kongah Thantlang, Hakha le Falam khua ah tuah dingin theihternak an tuah bal cang.
“Hi thil kan dohkalh lai an ti si zongah rampi cozah hnatlaknak in tuah mi a si. Vice President pumpak le rampi thingram zohkhenhnak minister pumpak zong an hnatla cang. An hnatla tinak in mizapi caah thathnemnak a um lai ti saduhthahnak he tuahmi a si. Cu pin ah hi hmun cu 1938 kum ah mirang nih tupi hual (ti chuahnak hmun) Area ah rak humhak cang mi a si. 1997 kum ah Laiva caah humhak mi tupi hual a rak si cang nak kong le hi hmun cu National Park ah humhak ding in le upadi he zong aa kalh lonak kong” Minister Pu Mang Hen Dal nih a chim.
Hi kongah Chuncung khuami hna nih Zinghmuh tlang thluan cu National Park chung ah telhpiak ding an duh lonak kong, Lai Tidil dilpiak an duh lonak le khuami hnatlaknak tel lo, hramhram in riantuan an duh lonak kong cu duhlonak lamzawh an rak i tim bal tiah kan theih.
Chin ramkulh cozah nih Zinghmuh Tlang National Park tuah dingah a timhlamhmi hi Hakha peng, Falam peng, le Thlantlang peng pathum chungah a ummi a si. Hakha peng, Chuncung ram hi ekah 7756 aa tel, Falam peng hi ekah 6809 aa tel, Thlantlang peng hi ekah 5372 aa tel. Chuncung nih an dohkalhmi hi anmah an ramchung ekah 7756 hi a si tiah kan theih.
