Zokhua Pawng Ah Motor Aa Let I Minung Pakhat A Thi; Minung Pahnih Sii-inn An Phan

Zokhua motor accident

City Hunter| 2018 June 29| Hakha-Gangaw lam, Zokhua pawng khan 19 le furlong pa 5 tluk ah inn saknak thilri a phormi motor pakhat cu June 28 zanlei suimilam 3:30 tluk ah aa let. Motor aa citmi lakah pakhat a thi i pahnih cu Hakha sii-inn an phan tiah kan theih.

Hi kong he pehtlai in Hakha palek sakhaan in tuanvo ngeitu pakhat nih, “Pakokku khua in Hakha lei ah innsaknak thilri phortu motor pakhat cu Hakha le Gangaw kar Zokhua pawng ah ah aa let. Hakha in khan 19 le furlong 5 tluk ah motor hnulei kehlei kam ke a kek i pe 150 tluk a sannak chengpalang ah motor cu a va tla. Motor aa citmi Pho Kyaw @U Kyaw Zin Oo cu a hnakhaw pahnih in thi a chuak i motor aa lehnak hmun ah a thi colh. Motor mongtu U Naing Wai Oo le workshop saya U Zayar Oo cu fak ngai in an i hliam caah sii-inn ah an tlikpi colh hna, thinphang dirhmun cu an si lo” tiah The Chinland Post ah a chim.

Motor mongtu U Naing Wai Oo cu ya-za-tat-gyi upadi pohmah 304-A/388 in ahmuh (case) tuah a si. Motor aa lehnak hmun ah Hakha peng meitat zung in zung motor pakhat le mizaw phorhnak motor pakhat he zung lutlai le tuanvo ngeitu upa 20 cu an va kal i chanhchuahnak rian an va tawlrel tiah Hakha palek zung in theih a si.
Photo Credit: Hakha IPRD

Na ruahning rak langhter ve.. (Leave a comment)

%d bloggers like this: