Zophei Bawipatlang Mino Hawikomhnak An I Lim; Aibur Nih Pumpululh Chuih Pakhatnak An Laak

0

TCP-Kalay| 2019 April 12| Zophei Bawipatlang Sianghleirun Siangngakchia Bu (ZPBSSB) tawlrelnak in kumtin tuah tawnmi Zophei Bawipatlang Mino Hawikomhnak le a lamkip thanchonak puai cu April 9-11 tiang Aibur khua ah sunglawi ngai in an tuah i tlamtlingte in an dih. Pumpululh chuih ah Aibur nih pakhatnak laksawng an laak tiah kan theih.

ZPBSSB mino I hawikomhnak cu chun ah lentecelhnak a phunphun, zan ah Bawipa thangthatnak le biaraldohnak in caan an hmang. Pumpululh chuih ah Aibur le Hmawngtlang final an kai i Aibur nih 3-0 in an teinak hna caah pakhatnak laksawng an co. Pa Volleyball bengh ah Modern Leitak nih pakhatnak le Leitak-A nih pahnihnak laksawng an laak. Nu Volleyball bengh zuamnak ah Hmawngtlang nih pakhatnak le Leitak Zipi nih pahnihnak laksawng an laak. Surlonhchuih zuamnak ah Modern Leitak nih pakhatnak le Kuhchah nih pahnihnak laksawng an laak. Hi I hawikomhnak tuah chung ah a thianghlim bikmi laksawng cu Kuhchah nih an co tiah ZPBSSB mino hawikomhnak ah aa tel vemi upa pakhat nih The Chinland Post ah a chim.

Tutan ZPBSSB ah aa tel khomi khua 6 in minung 300 hrawng an si. Relremlonak ruang ah khua hnih nih an telpi kho hna lo. Hi hawikomhnak cu kumtin thalchung (April thla) ah tuah lengmang ding in biakhiah a rak sinain relremlonak aum caah avoi 34nak ZPBSSB i hawikomhnak cu a ralaimi 2019 December thla chung Christmas le Kumthar kar, Aibur khua ah tuahding in biakhiahnak an tuah tiah kan theih.

ZPBSSB nih atu bantuk in i hawikomhnak an tuahhnawhchanmi cu zuamnak laksawng kha biapi ah chia lo in khuakip mino i hawikomhnak a thawnnak ding le a lamkip in thanchonak ding hi a si. Nihin (April 12) ah khual a tlungmi vialte an kir than cang dih lai tiah kan theih.

About The Author

Na ruahning rak langhter ve.. (Leave a comment)

%d bloggers like this: