Zophei Sianghleirun Sianghngakchia Bu nih Education le Human Right tlangtar in peng an tlawng

2019 0ctober 30| TCP Hakha| Zophei Bawipatlang Sianghleirun hruainak in Education le Human Right tlangtar in bawipa tlang chung um mi khua sarih ah chim phuannak an ngei tiah thawng kan theih.

Hi kong he pehtlai in Salai Elishama nih “atu hi avoih nih nak kan tlawnsi. A voikhat nak kan tlawn lioah Education le Health in kan rak tuah. Culio cawnpiaktu kan sawm mi hna cu Dr. HmuhThang le Saya Hmun Lian an si. A tu tan hi cu CHRO in Salai Van Biak Thang le Salai Sang Hnin Lian kan sawm hna.

Kan i ruahning nak in kan tlamtling ngai. Khuanu khuapa zong an i lunghmuih. A kan zulmi saya te pahnih cung hrim ah kan i lawm. Hmailei zong ah pehzulh in tuah kan i tim ko” tiah a peh.

October 21 ah Aibur in an thawk i 28 Congthia ah an dih.+++

Avoi 2nak Zophei Bawipatlang Sianghleirun Siangngakchia Bu Seminar le Dairy by Salai Tial Cung Lian
=========================================

Avoi 34 nak Zophei Bawipatlang Sianghleirun Siangngakchia Bu (ZPBSSB) bawlungpuai tuah dingin le timhlamhnak dingah Bawipatlang Aibur,Leitak (A),Leitak (B),Leitak (Zipi),Hmawngtlang,Phaikhua le Congthia nule pa hna sin ah Education le Human Rights tlangtar in khuakip cio zaankhat riakin kan tlawng kho hna.Hakha in Oct 21 ah kan i thawh.Khuakip ah University kai hawikom rual kan sawm pah hna.
Khuakip cawlcanghnak
Oct 21 zaanlei Muinawn ah Aibur kan phan.Aibur nupa minung 30 leng nih an kan don.Kan thil kan thumh dih in Zaanriah kan ei colh hna fale dawtnak he tiah Caw an kan thah.Cawsa le Varit sa an kan dangh mi hrim lunghmui kho tuk.An Biakinn church pal ah riahbuk an kan pek.Zaan ah Aibur Tipil Khrihfabu biakinn ah Biakinn khatthup in cawnnak kan ngei kho hna.Freedom of Religious tlangtar in Kawl Buddhist le Cozah nih Chinram ah Mission rian an tuannak kong le Khrihfa an kan namnehnak kong a kan cawnpiak.Zaan cawnnak a dih in Mino he Meeting le hawikomnak kan tuah hna.Zingka 6:00 AM ah kan tho Lakphak an kan dangh a dih in Sianginn ah Education kong cawnpiaknak kan ngeih hna.Chuncawnnak kan ngeih than hna.Minung 170 leng an kai kho.A dih in Leitak (A) ah kan khuallam kan peh than hna.

Leitak(A) muilai nawnah kan phan.Nupa le mino minung 20 leng nih an kan don.Zaan riah ah Ngalsa le Lai Ar an kan dangh.Zaan cawnnak Leitak Tipil Khrihfabu biakinn ah nule pa 10 leng an kai kho.Zing 6:00 AM ah kan tho lakphak kan dindih in Mino he Siapanglai Tikhor le Khuachung thianhlimhnak kan ngeih hna.Chuncawnnak kan ngeih kho.Human Rights kongcawnnak kan ngeih.Chinram ah Nah-tah-lah sianginn le Pura kong hna cawnnak kan ngeih kho cun Education kong sianginn ah cawnnak kan ngeih.A dih in mino he komnak kan ngeih.Zaan lei ah Leitak (Zipi) ah kan khuallam kan peh than hna.

Leitak (Zipi) khua luhlai ah Pastor nu inn ah kan in don hna timi catar khi motor cungin ka hei hmuh.Pastor nu te inn ah kan kal.Nulepa minung 20 leng nih an kan don i thlacamnak an kan ngeihpiak hmasa.Zaanriah kan ei Voksa le Sakhi sa an kan dangh.Zaan ah cawnnak kan ngei a dih in mino he hawikomhnak kan ngei.Kan baa pah cang caah zaan ah mino cheukhat an thohmaw zingka ah an thohmawnak kong hna kan chim pah.Zingka lakphak dindih in Mino he khuachun thianhlimnak kan ngeih kho.Chuncawnnak ah UN system le Human Rights a pehtlai ning kong tlawmpal chawnpiaknak caan an ka pek.Chuncawn kan ngei cun Siangngakchia sin ah Education kong cawnpiaknak kan ngeih.Zaan lei ah Leitak (B) ah khuallam kan peh than hna.

Leitak (B) kan phak tuan deuh caah Tiva ah Ti kan va i lio hna.A dih in zaan riah kan ei Voksa an kan dangh.Zaan cawnnak kan ngei a dih in mino he hawikomhnak kan ngei hna.Zingka lakphak dindih in mino he khuachung thianhlimhnak kan ngei.A dih in Chun cawnnak kan ngei cun Sianginn ah education kong cawnpiaknak kan ngeih.Zaan lei ah Hmawngtlang ah khuallam kan peh hna.

Hmawngtlang kan phan khuabawi inn ah an kan don.Zaan riah kan ei voksa an kan dangh.UPC biakinn ah Zaan cawnnak ngei kho.A dihin mino he meeting le biaruahnak kan ngeih kho hna.Zingka lakphak dindih in mino he khual thianhlimhnak ngeih.Chuncawnnak kan ngei cun Education kong cawnpiaknak kan ngeih kho hna.Zaan lei ah Phaikhua lei panh in khuallam kan peh than hna.

Phaikhua Tipil khrihfabu biakinn ah mino le nupa nih an kan don cun tluninn an kan phawt.Kan tlun inn cio ah rawl kan ei dih hna.Riahbuk ah kan i ton hna kan meh hal pah in copa kan sai pah.ZPBA pastor Pulpit thlen a si caah Tluangram in Pastor Ci Mang zong kan sin ah a rak phan ve.Zaan ah pumhnak le Human Rights cawnnak kan ngeih hna.Pastor pa nih Na sin ah Jesuh a thlatla maw? timi tlangtar in thawngtha an kan chimh.A dihin mino he hawikomhnak kan ngeih hna.Zarhpi ni zing pumh ah caan kan hman piak hna.Pumh a dih in Zaan lei 4:00 tiang cawnnak kan ngeih.A dih in Congthia ah kan khuallam kan peh than hna.

Congthia Khuabawi inn ah Bukip riantuantu, khua nupa le mino upa minung 30 leng nih an kan don.Zaan ah Congthia Tipil khrihfabu biakinn ah Pumhnak kan ngeih hna.Mino he zaan ah nuamhnak le Meeting kan ngeih hna.A dih in Nu tlun inn ah zaan 12:00 tiang khohshwe kan chumh hna i copo chimpah in caan kan hmang hna.Zingka lakphakti dindih in mino he Khuachung thianhlimhnak kan ngei hna.
Chuncawnnak kan ngeih dih in Cawnpiaktu saya te he biacahnak le Lunglawmh biachimnak caan kan hmang ta hna.A dih in thlahnak le kan mah le khua lei cio tlun dingin kan thil kan i timh hna.Hakha lei kal dingmi thlahnak an kan ngeih hmasa.Kan zaarhkhat leng kan umti hna tik ah kan i siangnak hna lo.Kan ngaih a chia kan li a leng.Caan nih a kan zat ti lo caah kan mah le semnak chungkhar lei hoih in kan khuallam cu peh in kan i then dih hna.

Atutan kan khualtlawnnak ah a telkho mi University cungah ka lawmtuk cun CHRO zung lei in cawnpiaknak a kan ngeihtu saya te an cungah kan i lawm tuk fawn.Chinmi kan dirhmun hi tih a nung ko cang lo maw?. Chinram hi Khrihfa ram maw Pura ram dah? timi kong hna zong tampi cawnpiaknak an kan ngeih.Cun khuakip innka kaupi a kan onhtu nupa cungah kan i lawm tuk fawn.Cun Vok siseh Caw siseh a kan thahtu,ramsa le a dangdang in a kan danghtu khuami nan dihlak cungah kan i lawm tuk fawn.Cun Chawva in a kan bawmchantu nan dih lak kan i lawmtuk fawn.Pathian nih Zophei Bawipatlang hrinsor dihlak kan caah a thlacuah za kan pehram ko seh tiah hi capar kan in lunglawmhnak kan rak langh ter.ka lawm.

Salai Aung Naing Oo (Tial Cung Lian)
Leitak