Zotung mipi 2 le hriamtlai hlun pakhat SAC ralkap nih an thah

The Chinland Post | 2022 June 24 – Chin ramkulh, Chinland Defense Force-Zotung cawlcanghnak hmunhma ah kahdohnak a tuahmi SAC ralkap nih mipi 6 an tlaih hna i cu chung in 2 cu thah an si tiah CDF-Zotung nih June 21 ah a thanh.

A luancia June 4 thok in CDF-Zotung hmunhma ah kahdohnak a tuahmi SAC ralkap nih mipi 6 an tlaih hna i khamnak caah an hman hna tiah theih a si.

SAC ralkap nih anmah chung in Antaw khuami U Win Soe Lwin (Kum-28) le U Myint Maung (kum-55) cu June 11 le June 12 ah an thah hna tiah a thanh.

An thahmi hna ruak cu June 18 le June 21 ah an hmuh hna i ṭha tein khangh an si tiah CDF-Zotung nih a thanh.

Cun SAC ralkap nih June thla zarhhnihnak  ah CDF-Zotung hriamtlai hlun a simi pakhat cu Rezua ah an tlaih i nihnih chung an hren hnu ah a chungkhar sin ah a ruak an pek ṭhan hna tiah theih a si.

CDF-Zotung chungtel hlun a simi pa cu thong chungah hri aa awk tiah palik sakhaan nih a chim.

A luancia June 12 ah Gangaw lei in kahdohnak a tuahmi SAC ralkap 70 hrawng cu Zotung hmunhma Ramsi khua he furlong 2 hrawng aa hlatnak ah an phan i hriamngan/hme he an kah thlorh tiah CDF-Zotung nih a thanh.

Na ruahning rak langhter ve.. (Leave a comment)

%d bloggers like this: