ZPBA Silver Jubilee, A Voi 22nk BM le ZPBA Zung Thar Onnak Sunglawi Ngai in An Tuah

ZPBA Singer Group/TCP

Salai Josephbawi| The Chinland Post| 2020 February 29| Zophei Baptist Association (ZPBA) Silver Jubilee (1995-2020), a voi 22nk ZPBA BM meeting, ZPBA zungthar onnak le Zophei missionaries hna lungphun onnak cu “Jesuh cu Bawi a si(Filipi 2:11” ti tlangtar in February 21-23, 2020 kar Congthia khua ah khual 700 fai he sunglawi ngai in an tuah. February 21 ah a voi 22nk BM meeting, February 22 zingah Missionaries le Silver Jubilee lungphun onnak, chun ah pension peknak le  Pathian thangthatnak, February 23 zingah ZPBA zungthar onnak, chun ah ordination peknak, Pathian thangthatnak le Jubilee zanriah dumtinak in caan an hmang tiah thawng kan theih.

“Kum (25) chung kan lamthluan vialte Pathian nih ZBPA a kan dawt, a kan umpi ko. Pathian ramthar riantuannak zong ah fakpi in kar hlan kan itim. Kan ZPBA zunginn thar saknak kong zongah Pathian thawng le ramchung ramleng um Zophei fanau le khrihfabu, cu lawng silo in ramchung ramleng khrihfabu dihlak thapek tanpinak thawngin kan tuah khawh hi a si. ZPBA ramchung khrihfabu lawng silo in Zophei Baptist Church, Indianapolis nih US$ 100,000/- an kan bawmh. Ramchung ramleng Khrihfabu le pumpak min langhter cawk lo in tangka an kan dirhkamh an kan bawmhmi cungah kan ilawmtuk. Hi zungpi sak hramdomhnak caah tangka a kan chuahpiak chungtu Zion Baptist Church (Hakha), Bethel Baptist Church (Hakha), Congthia Baptist Church, Sayakyi Ni Awi, Dr. Hmuh Thang, Saya Biak Cung (Thau), Pu Tial Ling (Rgn), Maung Maung (Hakha), Samuel (engineer) hna le Hopan Mandalay company nih felfai lo in an kan sakpiakmi ngolter in alak tein a kan sakpiak than tu Mercy Par Company Pu Thawng Kian sin hrim ah min char in lawmhnak chim ka duh ko” tiah ZPBA General Secretary Rev. N.Za Thang nih The Chinland Post ah a chim.

Zophei Baptist Church Indianapolis Choir

“US in ZPBA a lang chungtel a simi Khrihfabu (4) Indiana Ngalang Baptist Church (INBC), Indiana Emanuel Baptist Church, Chin Bethel Christian Church le Indiana Zophei Christian Church (IZCC) hna, Cun Zophei Iowa Christian Church, Chin Bethel Church (DC) le Maryland Chin Baptist Church (DC) hna khrihfabu min langhter lo mi tampi zong nih an kan bawmh. US lawng silo in a kan dirhkamh pengtu Australia le Europe um Khrihfabu hna cung zongah kan ilawm.” tiah a biapeh ah a chim.

Tutan Jubilee le BM meeting ah Rev. Ngun Kham cu Pension pek a si. Pastor Ngai Men (Zaabung) le Pastor Ngun Dun (Hlamphei) zong Rev. pek an si i Ordination pek te dingin Pastor Lian Chin (Leitak Zipi), Pastor Tial Hlun (Modern Leitak) le Pastor Tawk Kam (Phaikhua) zong cazin khumh a si cang i Ordination ngahnak ding (Ordination Thesis) an tialter lio hna tiah kan theih.

Zophei khuatlang lakah Pathian thawngtha bia a aupi hmasatu hna Matupi a kalmi Rev. That Dun (Tluangram), Mindat a kalmi Rev. Timothy Lung Tum (Vuangtu), Paletwa a kalmi Rev. Ni Hmung (Khuabung) le Zophei lakah pastor a tuan hmasa bik Rev. Heng Cin (Hripi) hna cu Zophei Family Network of America (ZFA) nih tangka sing 50 leng dih in ZPBA zung umnak Congthia ah lungphun an tuahpiak hna.

Hi kong he pehtlai in ZFA President Pu Van Ceu Thang nih “Pathian nih Zophei kan pa le hmangin rammui ah Pathian bia an rak aupi hmasatnak thawngin Zophei zong thluachuah kan co tiah kan iruah. Cucu Pathian sunparnak caah tiin le kan pupa hna kehhneh ruatthan in Thluachuah tinco than usih timi ruahnak he US um Zophei bu nganbik a simi ZFA nih meeting biachahnak he a tu bantuk kan tuah hi a si” tiah The Chinland Post ah a chim.

ZPBA Zung Onlio/ TCP

ZPBA Jubilee zan riah cu Leitak khuami Pu Tin Cung Nung te chungkhar nih an tuahpiak hna.

Tutan ZPBA Silver Jubilee le a voi 22nk ZPBA BM meeting ah Australia, USA, Europe lei in khual (50) leng an phan. Caan chung Thawngthabia chimtu (Speaker) hna caah 1. Rev. Moses Lal Bawi Peng (GS, CBAD, Denmark), 2. Rev. Dr. Law Ha Ling (CBC, Falam), 3. Rev. Tluang Mang (Australia Zophei Church), 4. Rev. Peng Ling (Melbourne Chin Church, Australia), 5. Rev. Ceu Kung (Hengcin Memorial Baptist Church, Hriphi), 6. Rev. Ngun Kham (ZBC, Indianapolis Associate Pastor, USA), 7. Pastor Than Sein (MCBC, Maryland), 8.Rev.Sang Cung Uk (Newzealand) hna an si. Biachimtu (Speech) sawmmi ah 1. Pu Za Peng Sakhong (ZFA, USA), 2. Pu Van Ceu Thang (ZFA Chairman, USA), 3. Pu Uk Mang (Kalay Zophei), 4. Pu Lian Uk (USA), 5. Pu Hniar Cung (ZBC, Indianapolis Church Chairman, USA) 6. Pu Ni Hmung (Yangon) le 7. Dr. Hmuh Thang 8. Professor Hmun Lian (Hripi) an si. Choir in ZPBA singers group, Hripi HMBC Choir, US ZBC Indianapolis Choir, hlasatu (Singers) ah Emily Ngun Hlei Sung (USA) le Samari Sui Tha Par (Aibur) sawm an si tiah kan theih.

Zophei Baptist Association (ZPBA) cu 1995 February 26 TABC Farrawn khua tuahmi in Thantlang Association of Baptist Churches (TABC) nih inndang chuahnak nawl pek mi a si. ZPBA cu chungtel Khrihfabu (25), milu (9000) fai, Area chungtel in Bawipatlang Area Baptist Churches (BABC khua (6)), Vuangtu Area Baptist Churches (VABC khua (6)), Khuabung Area Baptist Churches (KABC khua (7)) le Local in Congthia Baptist Church, Zophei Baptist Church (Indianapolis), Zophei Baptist Church(Hakha), Hengcin Memorial Baptist Church (Hripi), Australia Zophei Church (AZPC) le Indiana Zion Baptist Church (IZBC) hna an itel tiah theih a si.

ZPBA hruaitu hna (2019-2022) cu Chairman – Rev. Za Hre Lian(Modern Leitak), Vice Chairman- Rev. Ca Hram (Zephai), General Secretary – Rev. N Za Thang (Aibur), Asst. Secretary- Rev. Za Ceu (Congthia), Treasurer- Pu Lian Peng (Congthia), Asst. Treasurer- Pu Hlei Lian (Congthia), E & M Secretary – Rev. Thla Bik Lian (Modern Leitak),Youth Secretary- Rev. Cung Ling (Vuangtu), Women Secretary – Pastor Sang Iang (Congthia), Superintendent – Pastor Mezili Myint (Zephai), Clerk- Bawi Lian Thawng (Aibur), General Worker- Hei Vung Lian (lawngtlang),  Driver- Tial Ling Mang (Modern Leitak) le Cook- Ca Hniang (Lawngtlang) an si. +++

 

Na ruahning rak langhter ve.. (Leave a comment)

%d bloggers like this: