ZRA nih Tedim peng ah CDM pahnih le mipi 1 an tlaih/velh i khua chuahtak ding in nawl pek an si
The Chinland Post | 2022 June 22 – Chin ramkulh, Tedim peng, Kyaingpikut khua ah CDM a tuahmi 2 le mipi 1 cu Zomi Revolution Army (ZRA) Eastern Command phu nih an tlaih/velh hna hnu ah khua chuahtak ding in dan an tat hna tiah theih a si.
ZRA (EC) phu cu June 20 chun sml 3:00pm hrawngah Kyaingpikut khuate ah an rak lut i CDM a tuahmi saya pakhat, palik pakhat le sayamah pakhat cu khualeng thlaan pawngah an tlaih hna i sml 3 chung an velh hna tiah theih a si.
An velh dih hna hnu ah an thlah ṭhan ko hna nain June 25 hlan ah khua chuahtak ding in ZRA (EC) nih dan an tat hna.
“Thih duh lo ahcun an chuah a hau ko. An chungkhar ning tein. Dinei awk caah zuar awk a ṭhami an zuar lai. Zeiti awk ṭha” tiah Tedim khuami pakhat nih Khonumthung Burmese ah a chim.
An velhmi hna 3 hi lam zong an kal khawh ti lo caah khuami hna nih cycle in an va lak hna. Cu chungin pakhat cu khua in a chuak cang tiah theih a si.
Cu kong he pehtlai in ZRA (EC) nih June 21 ah cathanh an chuah i an pahthum hi Zomi phu cawlcanghnak midang hriamtlai phu sin ah thawng an pek ruang le khuanu khuapa hna nih awn ding tiah timhtuahmi sianginn cungah hnahnawhnak petu an caah kan tlaih hna hi a si tiah an thanh.
SAC nih Myanmar ram ah sianginn a awn ṭhanmi cungah hnatlaknak ka ngeihpi tiah ZRA (EC) nih May 30 ah cathanh a rak chuah.
ZRA (EC) phu nih hramhram in uknak a latu phu a dohtu Chin mipi hriamtlai phu pawl an sakhaan zong a rak kah bel cang.
2021 May 22 ah Tedim peng hriamtlai phu sakhaan pakhat cu ZRA (EC) nih a rak chuh bantuk in 2021 June 16 zong ah PDF-Zoland sakhaan pakhat a rak kah i meithal, eidin, sii le thilrii tampi (sing 60 leng man) a rak hrawh.
2021 September ah Tedim peng ah hrambunh a simi CDF-Hualngo sakhaan cu ZRA nih a rak hrawh, 2021 December 5 zongah PDF-Zoland hruaitu pakhat a simi U Cin Shan Sum zong Tedim khua ah ZRA nih an rak thah.
Cucaah CNA/CNF telh in Chin mipun hriamtlai phu 17 fonh in dirh a simi Chinland Joint Defense Committee (CJDC) nih ZRA cu misual phu tiah 2022 April 12 ah a rak thanh.
About The Author
