Zu Cawk A Kalmi Aibur Ngakchia Mino (9) nih Driver Aa Kha An Velh, Hnaring Siizung A Phan

0

Aakha A velhmi Aibur Mino Minung (9) Hnaring Palek Sakhan An Phakka/TCP

Salai Josephbawi| 2020 September 5| Aibur mino kum 14-18 kar ngakchia mino (9) cu Fangthen le Hnaring ah zu cawk an kal lio ah SKAT a mawngmi Aakha, Leipi khuami Hakha Leisen um (kum 34) le ahawi September 4, 2020 chun ah an ivelh hna i Aa Kha cu Hnaring siizung a phan tiah thawng kan theih.

An velh ning kongah Aakha nih “Ka hawi le pathum he kei nih motor ka mawng. Kan hawipa kaa kholh ta lai a ti caah Tisen khuataw tiva ah kan idin, kanmah pahnih motor chungah kan thu. Mino pawl cu Tisen khuataw Tiva ah hlei ah an rak um cia cang. An kan zohchih. Kan nau pakhat nih na theihmi an si maw a ka ti I ka theihmi a si lo ka ti. An ka zoh tikah ka tum i Lautu ram a si tikah Surgen hrawng an si ko lai ti khan ka va chonh hna. Kawlholh in an ka chonh. Lautu holh in ka chonh hna. An khua min ka hal hna tikah Leitak kan si an ka ti. Na ngamh maw na meih maw na duh maw an ka ti. Ka ngamh lo ee ka ti hna. Anmah le anmah Aibur holh in an ichon kha ka theih. Anmah pahnih lawng an si velh ding an si ko. Zeidah kan phak chanh cu an ti khi ka theih. Zei nan ti lai ka ti i Hnaring ah Zu kan va ding lai an ti. Ka hngawng hna an ka hmeh. Cycle pathum in minung (9) an si. Cu dih cun Sentung lei an kai. Ka kal ti Tisen pawngah ka motor a rawk i Keimah le ka hawipa kha Hnaring ah kan kir. Ka Sapiar pa nih ka motor a mawng. Sentung lampial ah an rak thu. Thil tlak ding a um caah kan dir i Tunai velh kan timmi pa a si kha an ka ti I kan ivelh colh. Kan ivelh lio ah Aibur Cakei an timi kha ka theih. Leitak an si lai lo Aibur an si ko kan ruahmi cu a si. Sentung le Fangthen ka chonh hna I minung 50 fai an ra nain an tli cang. Tisen kan chonh hna hna an lonh cang an kan ti caah Aibur kan chonh hna, rak kan tlaihpiak u kan ti hna I Aibur nih an kan tlaihpiak hna. Keimah kha an ka velh deuh. Velh hlah u ti zong nu pawl nih an ti hna nain. Cassett kan philh an ti I an rak lakthan. Hnaring lei in motor a rak phan I pahnih nih kan velh hna lai an ti nain Pastor pa aa tel caah velh duh hna hlah u tiah an tlauh hna. Ka ha a cung lei pahnih a kiak, pahnih aa hnin. Hnaring siizungah an ka chiah. Atu hi Aibur khua nupa zong an rak phan, Lautu khua upa zong an an tling, an rak phan. Upa pawl he cun an chim lai nain keimah cu Upadi ning tein tawlrel ka duhmi a si” tiah a chim.

Hi kong he pehtlai in Aakha velhnak ah aa telmi Aibur mino pawl nih “Fangthen lei kal kan itim I Tisen khuataw Ti-Aa-Tii (Palangva) ah kan hawi cycle pakhat a rak phan rihlo caah kan zun pah in kan hngak. Cu ahcun Fangthen lei kap in SKAT Motor cu a rak phan I an dir ve. Innka in pakhat pa nih a kan bih, sau ngai an kan zoh. Nan theihmi a si maw tiah kan ihal I kan theihlo an ti dih. Rak kan zoh hlah tiah kan ti I Driver pa nih hman a kan thlak colh. Zei ruangah hman na kan thlak delete than kan ti. A delete zok duh lo I kan in velh lai kan ti. Cu hnu cun a delete than I ngaihthiam kan ihal. Lungthiang tein kan kal than. Sentung lampial ah nungak pahnih nih Kunya an zuar I kan cawkpah hna in kan len hna. Cu ahcun Paungmuh Motor in velh kan timhmi pa ahawi pasarih le nu pahnih he an rak phan. An SKAT zong a hnu ah a rak phan. Velh kan tim ruangah velh ah a kan rat hnawh thanmi a si. Motor in a rak tum le cangka in Cycle tawh kan phoihta lomi cu a kan zukpiak I a kan rathnawh colh caah kan ivelh colh hna. Cycle tawh a kan hlonhpiak caah amah Driver pa kha fak deuh in kan velhve mi a si. Amah lawng kan velhmi silo in zapi in kan ivelhmi a si. Anmah pasarih kanmah pakua kan si. Hnaring Palek an chonh kan theih caah Aibur lei kan rak tli than” tiah The Chinland Post ah an chim.

Hi kong he pehtlai in Aibur Khuabawi Pu Duh Hmung nih “Kanmah Aibur kan palh bakmi a si ko. Hi hna ngakchia hi sianginn zong an kai tilo. Nu le pa zong nih chim khawhlomi phun an si. Khuami aiawh in an nu le pa dihlak, Khua upa Hnaring kan phan. Lautu khua lamnai upa zong an phan I ceihhmainak kan ngei. An velhmi kan nau pa a nu le pa belte Hakha a ummi an si caah Hakha lei tu ratthan kan hau. Hi bantuk kan khua ngakchia mino nih kan naupa Aakha an velhmi cungah khuami zong kan ning a zak, kan ngaih a chia. Aibur le Lautu innpa te kan si tikah Lautu lei zong nih phundang in an kan ruahnak hnga lo, hi bantuk thil a cangmi cungah kan ngaithiam hram ko hna seh, kan in nawl ko hna. Leitak min ningcang lo in an hmannak kong zongah Leitak khuami nih nan kan ngaithiamnak lai kan in nawl ko hna. Kan fa kan nau lungfimnak ca tu ah sihram ko seh. ” tiah The Chinland Post ah a chim.

“Kan khua chung thil a cangmi si lo in Mi khual mi ram ah siizung phak tiangtiang in mi va velh hi cu a sual taktakmi a si. Khuami kan ning a zak, mihmai khap zong a si lo. Kan palh tileng in chim ding a um lo. Kanmah Aibur Youth Organization (AYO), Aibur Youth Fellowship (Aibur) hrimhrim nih fakpi in dantatnak kan tuah hna lai. Velh a tongmi Aakha le chungkhar, Leipi khuami le Lautu mi zong Aibur mino aiawh, khuami aiawh in ngaihthiam kan in hal ko hna. Nan kan timi cungah kan cohlan dih ko lai. Hmailei kan nau le lungfimnak ah cang hram ko seh” tiah Aibur Youth Organization president nih The Chinland Post ah a chim.

Aakha a velhtu hna cu 1. Ram Hlun Thang (kum 18), 2. Thio Mang (18), 3. Cung Awr Thang (17), 4. Hoi Ling Mang (17) 5. Hlun Sang (17), 6. Bawi Nun Lian (16), 7. Biak Peng (17), 8. Ceu Cin (17) le 9. Ngun Tha Cung (14) an si I Hnaring Palek Sakhan ah an chiah cang hna tiah theih a si.

 

About The Author

Na ruahning rak langhter ve.. (Leave a comment)

%d bloggers like this: