AC Naylon Kat-taza Chin Ramchung Dihlak Ah Phah An Tim

Salai Elvis| 2018 January 21| Atu lio Hakha khuachung ah an phah liomi AC Naylon kat-taza cu a rauh hlan ah pehzulh in Chin ramchung dihlak ah phah dih ding in ramkulh cozah nih timhtuahnak an ngei ti thawng kan theih.

Hi kong he pehtlai in Chin ramkulh hluttaw Speaker Pu Zo Bawi nih, “Atu Hakha an phahmi hi khuachung lam khan (meng) thum le Sakta lam falong 4 ca lawng a si rih. Hakha khuapi chung lam dihlak khan 14 a si i tlamtling tein an phah dih hnu ah, Hakha a dih in Falam, Mindat le Matupi pengkomh hna hi papek deuh in kan tuah hmasa rih lai. Cu dih ah Myo a si mi khua ah phah a si than te lai” tiah The Chinland Post ah a chim.

Atu lio AC Naylon Kat-taza an phah lio ah hin khuachung lam a bi deuh mi zong kauh chap ding a si lai. A biana ah me-ti-lah (phungki nu) pawl an umnak pawng, sakremhnak zung pawng, penguk zung pawng le khuathar se-miang zung chak hrawng le lam aa kuaih deuh nak pawl khi ningcang tein remh hmasa i kat-taza aa phah lonak paoh hi a si khawh chung in phah dih ding zong kan saduhthah a si” tiah Pu Zo Bawi nih a biapeh ah a chimchih.
Atu bantuk in AC Naylon Kat-taza an phah liomi cu ramkulh cozah nih 2017-2018 kum ah khuachunglam khan thum caah (2608.500 million) dih in ramkulh sakremhnak zung nih an phah lio a si. 2020-2021 kum ah Hakha khuachung lam khan 14 le falong 1 phah dih ding in timhtuahnak an ngei tiah theih a si. +++