Chin MP Hlun Le CNF Former Chairman Dr. Za Hlei Thang Mual A Liam Ruangmang Cang

TCP-Online| 2018 March 18| 1990 kum ah Chin ramkulh Falam peng in Pyithu hluttaw MP le tu lio CNF ah former chairman a tuan liomi Dr. Za Hlei Thang cu US ram Maryland State, March 17 ahkhan cuap lei zawtnak in mual a liam ruangmang tiah thawng kan theih.

Dr. Lian Hmung Sakhong nih “Tuzing ah Airport lei ka kal pah Taxi cung ah Mite pa a thih tiah thawng ka theih. Fak tuk in ka rak tuar. Chin miphun ca ah nangmah he hin 1988 kum in rian kan rak tuanti. 1991 kum ah CNLD member, UNLD-Liberated Areas hna ah kan rak cawlcang ti. Chin Forum zong hmunkhat ah kan rak dirhti, cun CNF zong ah kan rak lut ti. Kan miphun ca zalonnak le daihnak lam thluan ah nangmah he kum saupi kan rak kal ti. Tu zong ah kan kal ti rih dingmi tampi a tang rih. Tu ah CNF nih kum 30 tlinnak ding Chin Revolutionary kan tuah lai, nang na bau cang ne lai mu. Mite pa, na um ti lo hnu zongah na thantar iput in Chinram nih zalonnak kan hmuh khawhnak ding kan rak kalpi ko rih lai, dam tein” tiah a tial.

Dr. Za Hlei Thang nih a nun lioah CNF (Chin National Front) a luhnak kong he pehtlai in tampi soisel a rak tong bal. Cu i a chim tawnmi cu “Chin miphun a huap khomi cu CNF lawng hi an si. Falam pawl nih ‘ziang ruangah CNF, Halkha hnen na lut, titsa phoh’ tiah an kan ti. Nain kei nih CNF ka luh hi titsa phoh ah ka ruat lo. CNF hi Hakah ca lawng dirhmi sisehlaw ka lut hnga lo. Falam ca lawng sisehlaw ka hei lut hlei hnga lo. Chinmi miphun dihlak an kan huap khomi a si caah ka luhmi a si” tiah a rak chim.

Dr. Za Hlei Thang cu 1943 kum April 6, Falam peng Tlauhmun khua ah a chuak i a thih ah kum 75 a tling. Yangon ah tanghra a dih, tanghra a dih nak hmun ah hin a mah tel in minung 3 lawng nih sii lei kainak Doctor an rak kai kho. Salai Tin Maung Oo nih Chin Literature & Cultural Committee ah a sawm i a rak lut. Tlawmpal ah ralkap nih Salai Tin Maung Oo cu an rak tlaih i cu lioah Dr. Za Hlei Thang hi a inn in chuak ngam lo in sau nawn a rak i thup.

“Dr. Za Hlei Thang hi sianghngakchia a rak si lio te in miphun dirkamhnak ah hmaisuang a rak si zungzal. Ne Win cozah nih saupi thong an rak thlak. A chuah hnu ah sianginn a peh than i Siibawi rian a tuan. 1990 thimnak lio ah Falam peng in MP a tling mi asi. SLORC ralkap cozah nih tlaih an timh caah ramleng ah a rak chuak mi asi. 1994 kum Marnepalaw KNU hmunlipi ah kan rak ihmu hmasa bik. Mah hnu cun 1998 Ottawa Chin seminar ah kan i tong than. 2011 CNF conference ning in 2012 thok in hmasabik Supreme Council Chairman a tuanmi asi. Amah a tuan lio ah CNF le Kawl cozah ahmasa bik chawnhbiaknak an thawk asi. Mi nunnem, miphun daw, pa chuakthiam asi” tiah CHRO in Executive Director Salai Bawi Lian Mang nih a facebook ah a tial. Dr. Za Hlei Thang a nupi cu Sayamah Ni Dong a si. Fanu Dr. Milan Za le fapa San Oo Za a ngeih hna.

2016, a hmasa bik Union Peace Conference, 2016 January 12-16 tiang tuahmi ah CNF phu cu amah nih a rak hruai hna. Cu lio ah CNF phu in meeting a kaimi hna cu;