Chin Ramkulh Ah Tual Chung Minung 4 Cu Kum Saupi Thongthlak Ding In Bia An Khiah Hna
The Chinland Post | 2024 February 15 — Chin ramkulh Mindat le Hakha khua um pa 4 cu Martial Law biaceihnak zung nih kum saupi thongthlak ding in bia an khiah hna tiah theih a si.
Mindat khua um Lingkhawke cu dothlennak phu pawl facang, chiti, cite pawl na bawmh hna, thawng na kan pe lo, cozah rianṭuantu pawl sual buar ding in a tuah hna caah pohma ၅၀ (ည) ၅၂ (ခ), pohma ၅၀၅ (ဂ) hna in nun chung thongthlak ding tiah bia an khiah hna tiah February 14 ah SAC lei thawngzamh Fifty Two News nih a langhter.
Cubantuk in Mindat khua um Om Ling Ke zong dothlennak phu pawl sin ah training na kai, cozah zung pawl, himnak sakhaan pawl, rampi ngeih mi inn pawl fakpi in na hrawh tiah pohma ၅၀ (က), ၅၂ (က) hna in thongthlak ding tiah bia an khiah hna.
Cun Hakha khua um Ngun Hlei Thang @ Robert le Van Chan Ceu hna zong dothlennak phu pawl sin ah training kai, dothlennak phu pawl he pehtlaihnak nan ngei tiah pohma ၅၂ (က) ning in thong kum 7 thlak ding in dan an tat hna tiah SAC lei thawngzamh Fifty Two News nih a langhter.
A luancia January 25 zong ah Hakha khua um Ni Bawi Thang le Ni Hlawn hna cu pohma ၅၀ (ည) in nun chung thongthlak ding, Hram Nawl Thang cu pohma ၅၂ (က) in thong kum 7 thlak ding tiah bia an khiah.
About The Author
