Chinmi Nih Cycle Khawndennak Le Zulhphung Buar In Thlahnih Ah Ks. 15,364,000 Kan Liam I Mi 9 An Thi
Salai Ngun San Aung| 2018 March 7| Chin ramkulh khuapi 9 chung um mi nih January le February thla hnih chung lawng ah motor leh, cycle leh, i pah nak le zulhphung buar ruang ah kan liam mi tangka hi MMK 15, 364, 000 a si tiah Ramkulh Motor PK zung cazin ning in kan theih.
Khawndennak le zulhphung buar tiin phun hnih ah then a si. Khawndennak hi Hakha ah voi (7) a um mi minung 4 an thi. Tangka in dan liam mi 965,000. Falam ah voi (2), pakhat a thi i tangka in 134,000. Mindat ah voi (3) khawndennak a um i pahnih an thi. Tangka dantat mi 5,005,000. Tedim ah khawndennak voi (5) a um i pathum an thi. Tangka dan liam mi 1,360,000. Matupi ah khawndennak (1), tangka dan liam mi 200,000 le Thantlang ah khawndennak (2) a um i tangka dan liam mi 530,000. A dihlak liam mi 8,194,000. Tonzang, Kanpetlet le Paletwa ah zeihmanh a um lo.
Zulhphung buar ruang ah dan liam mi cu a tanglei ning hin a si.
Hakha ah dan liam ter mi Motor 23, Cycle 63 an si i liam mi 1,260,000. Falam ah Motor 4, Cycle 13, tangka liam mi 580,000. Mindat Motor 1 le Cycle 52, tangka liam mi 1,610,000. Tedim Motor 9 le Cycle 46 a si i tangka liam mi 1,710,000. Matupi cycle 15, tangka liam mi 450,000. Thantlang Motor 7 le Cycle 25, tangka in 960,000. Kanpetlet Cycle 20, tangka in 600,000 a si. A dihlak ah 7,170,000 a si. Paletwa ah zeihmanh a um lo.
“Chin mi 400,000 fai lawng kan um nak Chin ram ah Myanmar ram chung sifak bik mi nih thla hnih chung ah hi vialte kan liam mi hi tuak tikah zaang ram tak tak a si. Hihi Motor PK nih cazin an ap mi lawng a si. Zung ah cazin ap loin an zal chung ah an i sanh mi zeizat remruam dah a va si rih hnga. Hakha hrim hrim ah Cycle 63 lawng kan tlaih an ti mi hi a si kho lo. Zarhkhat ah a tlawmbik voithum tluk zulhphung a zul le zul lo an chek cu mu. Voikhat an check ahhin a tlawmbik cycle 10 cung an tlaih, cucu nan mithmuh kan mithmuh cio a si ko. Zarh khat a tlawm bik in tuak piak hna usilaw cycle 30 cu an tlaih hrim hrim. Thlakhat hmanh ah cycle 100 leng an kan tlaih ti nak a si. Cucu thlahnih chung ah 63 lawng an langhter tikah anmah nih an ei mi a let in a tam deuh rih ti a fiang. Cucaah Chin mi nih thlakhat ahhin sing 100 paoh cu zulhphung kan buar ruangah tangka kan liam ti nak a si. Cycle zong kanmah tein kan i cawk kho lo. Ram leng um kan unau cawk piak mi cycle cu ning cang tein kan hmang lo, zu kan ri i kan hei i pah in aa khawng mi le sii-inn phan mi nih an dih mi tangka vialte zeizat dah a va si rih hnga. Cun ruah khawh loin a thi mi an va um i ngaktah cu lo ngaktah in kaltak mi fale an tam pi bantuk in thih cu lo ah ruah mi kan mino tha tha an thih mi hi tuak ngiaimai tikah kan miphun nih kan sungh mi a tam tuk hringhran” tiah upa pakhat nih a chim.
Motor PK zung nih thla hnih chung ahhin peng kip ah zulhphung cawnpiaknak 65 an tuah cang i cu cawnpiaknak ah a kai kho mi 6534 an si tiah an cazin ning in kan theih. +
About The Author
