Hakha Khuachung Ah SAC Ralkap Pawl CDF-Hakha Nih An Kah Hna
The Chinland Post | 2024 March 19 — Chin ramkulh, Hakha khua ah SAC kuttang zung rianṭuantu pawl le palek pawl nih mipi inn khat hnu inn khat lutchuak in chungkhar cazin lak le ralkap tla ding min cazin an lak hna caah CDF-Hakha nih an kah hna i kaphnih karlak kahdohnak a chuak tiah theih a si.
March 18 zaanlei sml 2:00pm thawk in Hakha khua, Dawrhlun sang ah kahdohnak a chuak i zaanlei sml 5:15pm tiang sml 3 leng kahdohnak a rau.
“March 18 zinglei thawk khan Hakha khua um SAC ralkap le palek pawl nih hmun tampi ah hmunhma an la cang. Cun Keisih sang lei ah chungkhar cazin laknak le ralkap tla ding an vak. Cu hnu caan tlawmpal ah kahdohnak thawng a thang colh ve. Kahdohnak caan hi a sau ngai. Kan ṭih tuk i inntang ah kan i thup” tiah Hakha khuami pakhat nih The Chinland Post ah a chim.
Cubantuk in March 19 zinglei zong ah SAC ralkap le palek pawl nih Hakha khua hmun tampi ah hmunhma an la i Tita sang lei ah chungkhar cazin le ralkap tla ding cazin an la ṭhan tiah thawng kan theih.
SAC ralkap pawl cu Pyidawta Grace Baptist Church tualchung zong ah hmunhma an la tiah theih a si.
Cun zinglei sml 9:00am hrawng in Pyidawta-Dawrhlun lei ah kahdohnak a thawk.
Kahdohnak chung ah SAC ralkap lei kah mi hriamngan cu Agape siikhaan hmai le Cason Hall pawng hrawng ah a tla tiah thawng kan theih.
“Dawrhlun sang cu ralram a si cang ko. Mino kan in hmuh mi poah kan in kah hna lai an kan ti” tiah adang Hakha khuami pakhat nih The Chinland Post ah a chim.
Kahdohnak chung ah a thi le hliamhma cazin bel theih a si lo.
SAC kuttang ah rian a ṭuan i zung rianṭuantu pawl zong SAC ralkap pawl he aa khat tein hmalak nan si lai tiah CDF-Hakha nih nihin March 19 ah thawng a thanh.
Cun atu bantuk in hmailei zong ah kahdohnak a chuak kho mi a si caah mipi hna nih umkal i ralrin ding le SAC cawlcanghnak thawngthanh ding in cathanh chung ah an ṭial chih.
SAC nih (Military Service Law) a thanh hnu ah mino tampi lungrethei in an um hna. Hakha passport zung zong ah passport a tuah mi an karh i Yangon International Airport zong nihin March 19 cu minung an khat tiah thawng kan theih.
About The Author
