Hringtu Nu Daithlan Ruang Ah Ke Pathum He A Chuakmi Ngakchia (video file)
City Hunter| 2018 March 27| Hringtu nu pakhat cu fa a pawi lio ah siilei thlopbulnak le i cheknak a caanhmaante in a ngeih lo ruang ah a hrinmi a fate cu ke pathum ngei in a chuak. Hi ngakchia te cu hlaithiam (operation tuahthiam) siibawi hna nih Tuluk ram Shanghai khuapi sii-inn ah chekhlainak an tuah.
Xiao Fei tiah auhmi thla 11 ngakchia te cu faphir a si dingmi bantuk a takpum chung ah nau sem a cuang. Hi bantuk thil a cangmi cu minung 500,000 ah minung pakhat tluk sin lawng ah a cangmi thil a si. Cuti thil a si hmanh ah minung 1,000,000 ah minung pakhat tluk lawng a nungdammi khuaruahhar thilcang a si.
Xiao Fei, hringtu a nu nih a pawi lio ah chekhlatnak caanhmaante in aa tuahlo ruang ah fa a hung hrin taktak tikah atu bantuk in ke pathum ngei fa a hrinnak hi a si. A hlei in ke pakhat aa tel chihmi hi a phei le a phei aa tonnak zawnte in a chuah ruang ah ngakchia zunte le zunpi lamthluan kong ah tampi harnak a um.
Hika ah siibawite nih chekhlatnak an tuah lio muicawl (video) zoh khawh a si.
Cu pin ah ngakchia a orhlei ke hi kut bantuk a si i a cawlcangh khawh lo caah tampi harnak a tong. Shanghai sii-inn in siibawite nih ngakchia cu suimilam 10 chung chekhlainak an tuah hnu ah a hlei in a chuakmi a ke pakhat cu an hlonhpiak khawh. Cun, a cawlcang kho lomi a orhlei kam a ke zong an tanpiak i a hlei in a chuakmi ke in khan an bunhpiak than. A donghnak ahcun chekhlainak an tuahmi tlamtling te in an lim khawh.
Siibawite chimning ah ngakchia nihhin kum zeimaw zat cu a tuar rih lai caah kum 3 a tlin ni ah sii-inn ah voikhat in rak hmuhsak rih u law chekhlatnak kan tuah rih lai an ti. A orhlei ke hi an bunhpiak chommi a si caah a sining kelte in a than/a sau lai lo caah chekhlainak tuah i zaam le dawhpiak a hau lai an ti.
Ref: Popolay, Buzz Myanmar