Matupi Peng, Lailenpi Khuami 1 Bomrap Lamh Sualnak In A Thi, 1 Aa Hliam
The Chinland Post | 2024 March 8 — Chin ramkulh, Matupi peng, Lailenpi khua pawng ah lo duah ding in a kal mi Pu San Win Naing cu March 8 zinglei ah bomrap aa lamh sual caah a thi, a hawipa 1 zong aa hliam tiah thawng theih a si.
Lo duah caan a si caah Lailenpi khuami hna nih lo nan duah lai ah CNA sin ah nawl nan hal hmasa lai i CNA nawl lawng in lo nan duah lai, khualeng a chuak mi khuami hna nih zaanlei sml 4:00pm hlan ah khuachung nan lut dih ṭhan lai. Zaanlei sml 4:00pm hnu ahcun luhnak nawl kan in pe ti hna lai lo i zaanlei sml 4:00pm a tanh manh lo mi nih ramlak ah riah beh ding in CNA nih nawl an chuah.
A thi mi Pu San Win Naing le a hawipa cu CNA nih an chuah mi zaanlei 4:00pm hlan ah khuachung luh ding timi kha an tanh manh lo caah ramlak ah an riak i a thaizing khuachung luh ding an kal lio ah bomrap lamhsualnak in a thih hi a si tiah Lailenpi khua thawngzamh nih an langhter. Hliam a tuar mi a hawipa bal hi a hliamhma a din deuh ngai tiah Source LLP MTP nih a langhter.
About The Author
