Mawlamyine kahdohnak ah PDF 5 telh in 6 an tlaih hna
The Chinland Post | 2022 November 16 – Mon ram, Mawlamyine khua, Zeyarthiri sang, Sapae lam ah a um mi ṭaih khaan pakhat cu SAC ralkap nih an luh hnawh hna i innchung a um mi 6 an tlaih hna tiah thawng kan theih.
November 14 zaanlei sml 4:30pm hrawng ah SAC ralkap nih ṭaih khaan pakhat an luh hnawh hna i kaphnih karlak kahdohnak a chuak.
Kahdohnak chung ah ṭaih khaan chung a um mi pa 5 le nu 1 hriam he an tlaih hna tiah khuami nih an chim.
“Kahdoh a sau ngaingai. Sml 2 leng hrawng a rau lai. Kahdohnak a dih in SAC lei nih 6 hriam he an tlaih hna” tiah a chim.
An tlaih mi hna chung in Special Underground Movement Force – Mawlamyine phu in PDF 4 le nu 1 an i tel i anmah he hriam 3 zong an lak piak chih hna tiah an thanh.
Kahdohnak chung ah palek 2, khuabawi fapa 1 an i hliam i palek 1 le khuabawi fapa cu a thi tiah theih a si.
Kahdohnak ruang ah inn pakhat a rawk.
About The Author
