Mindat Khua Ah Sangkhat Nih Minung 115 Ralkap Lut Ding In SAC Ralkap Nih An Chimh Hna
The Chinland Post | 2024 February 20 — Chin ramkulh, Mindat khua um mipi hna cu ralkap lut ding in SAC nih an hnek hna i sangkhat ah minung 100 leng cazin kan lak lai tiah Mindat khuami hna chim mi cherhchan in People’s Spring nih a langhter.
Mindat khua Sanpiah sang, nitlak lei sang, a-shi-pin sang, ba-wa-thit sang hna ah a um mi mipi pawl cu SAC nih ralkap lut ding in pa 70, nu 45 tel ding in cazin kan lak cang lai tiah Mindat lei thawngzamh zong nih an langhter.
“Kum rikhiah kha a biapi ah chiah lo in mi tlinnak an tuak tiah kan theih. Umkal kan i ralrin tuk a hau” tiah Mindat lei thawng petu nih People’s Spring ah a chim.
SAC nih ralkap lut ding in cazin a lak mi lawng nih hin mipi pawl a dawk kho hna lai lo tiah Mindat khuami pakhat nih People’s Spring ah a chim fawn.
“A hranak hmang in hramhram in a dawh hna ahcun a khawmh khawh lai. Cazin lak sawhsawh lawng cun a khawm kho lai lo. Kuate lei ah an zaam pah cang hna” tiah a chim.
A luancia ni tlawmpal ah SAC thilphor vanlawng nih le-hti hmang in a rak thlak mi thiltom chung ah kuan, eidin leng ah uniform pawl zong aa tel tiah an chim fawn.
A luancia February 14 ah Mindat khua LIB 274 nih le-hti in thiltom 10 a thlak tiah The Mindat Post zong nih a langhter.
About The Author
