Mindon hmunhma PDF sakhaan pakhat luh hnawh an tong i PDF 30 hrawng an tlaih hna
![](https://i0.wp.com/thechinlandpost.info/wp-content/uploads/2022/09/SAC-nih-lakmi-Mindon-peng-PDF-sakhaan_2022-Sep-9.jpg?fit=640%2C640)
The Chinland Post | 2022 September 9 – Magway ramṭhen, Mindon peng Mindon, Thayet, Kamma, peng 3 fonh in dirhmi hriamtlai phu sakhaan pakhat cu a luancia September 4 ah luh hnawh an tong i chungtel 29 an tlaih hna tiah Mindon PDF nih a chim.
Peng 3 fonh in dirhmi a si caah thazang a sawm in an umnak sakhaan cu thawngpetu Dalan ruangah luhhnawh an tong i a zaam manhmi zong an um tiah theih a si.
“Anmah phu nih kan hmunhma ah kahdohnak an tuah lengmang. Cucaah mah PDF phu cu a langhhlat in an kah hna, ramlak ah an kawl hna. Atu an tlaihnak hna a ruang cu thawngpetu nih sakhaan umnak tiang lam a hmuhsak hna. Kan i ruah lo tuk lioah luh hnawh kan tong, Minung 40 hrawng an luat i 29 tlaih an tong” tiah Mindon PDF rianngeitu Salai Aakaa nih BBC ah a chim.
Atu bantuk in PDF sakhaan luh hnawh an ton hnu zong ah sakhaan pawngkam ah a ummi Latpua khua ah an lut i khuabawi telh in khuami hna cu sakhaan caah bawmhnak nan pek tiah an puh hna i an tlaih hna tiah a chim.