Mipi Thihlohnak A Tam Bik Ram 5 Chung Ah Myanmar Aa Tel
The Chinland Post | 2024 April 2 — A luancia February thla ah vawlei pumpi chung puahkehnak vialte ruang ah mipi thihlohnak a tam bik ram 5 cazin an lak mi chung ah Myanmar zong aa tel tiah Action on Armed Voilence (AOAV) nih a thanh.
AOAV phu hi London ah hram a bunnh mi Non-Government Organization phu pakhat a si i vawlei pumpi dihlak hriamtlai buainak le a hnulei a phichuak pawl a hlathlai mi phu an si.
Mirang ca in an langhter mi thawngzamh pawl ngat in hlathlainak an tuah mi ram 5 hna cu Myanmar, Gaza, Ukraine, Syria le Pakistan ram hna an si.
Myanmar ram ah a luancia February thla lawng ah puahkehnak voi 38 a cang i cu chung voi 27 ah mipi thihlohnak a um i minung 270 deng an thi, minung 20 hrawng i nu le hngakchia an si hna tiah AOAV phu nih an chim.
Cun cubantuk puahkehnak 99% hrawng hi mipi umnak hmun pawl ah a cang i peng le ramṭhen kip kan zoh a si ahcun Rakhine ram thlakhat chung ah mipi 117 an thi i Sagaing ah 84 in a pahnihnak a zulh i Shan, Bago, Kayah, Mon le Chin ram hna zong ah mipi thihlohnak a um ve.
Cun puahkehnak pawl hi mipi an tamnak hmunhma pawl ah a can caah a thi mi 91% hrawng hi sualnak ngei lo mipi an si hna i adang hmun pawl ah 14% lawng a cang tiah theih a si.
About The Author
