MP Pu Ngun Hei; Nihin Ramkomh Hluttaw Ah President Thimnak Kan Tuah Rih Lai Lo
City Hunter| 2018 March 26| March 26 ah tuahmi ramkomh hluttaw ah President thimnak le fehternak an tuah rih lai lo. President caah chuahpimi Vice President U Win Myint kha president tlin khawhnak tahfung a tling maw tlinglo timi zohfelnak le fehternak lawng an tuah rih lai tiah kan theih.
Hi kong he pehtlai in Hakha peng, Amyotha hluttaw in MP Pu Ngun Hei nih, “Nihin March 26 ah tuahmi ramkomh hluttaw ah president thimnak le fehternak kan tuah rih lai lo. Pyithu hutttaw nih President caah chuahpimi Vice President U Win Myint kha president si khawhnak tahfung a tlinh maw tlinh lo timi cheknak le fehternak lawng kan tuah rih lai. Cu bantuk a chekfeltu ding ah committee zong ser a si cang. President tahfung a tlinh le tlinhlo chekfeltu committee nih an hmuhchuahmi kha hluttaw nih fehternak a tuah ceo lawng khi a si ko lai” tiah The Chinland Post ah a chim.
“Kanmah NLD palai nihcun Win Myint nihhin President si khawhnak tahfung a tlinh ko lai, tlinhlonak a ngei lai lo ti kan zumh. Cun, amah hi President ca ding ah zapi duhmi zong a si fawn. Cun, President zong a tuan kho dingmi pasal tha a si ko. President thimnak taktak cu March 28 ah a si lai ti ka ruah. Zei ruang ah ti ahcun thaizing March 27 cu Ralkap Ni a si caah zungkhar le hluttaw meeting tuah a si lai. Cun, March 29 (nili ni) khi kanmah Amyotha hluttaw meeting kan tuah ve cang lai. Cu ruang ah a fiangmi cu March 28 ah Myanmar rampi President thimnak le fehternak a si ko lai ti ka ruah” tiah a biapeh ah a chimchih.
Pyithu hluttaw nih an thimmi Vice President U Win Myint cu President si khawhnak tahfung a chektu ding minung 7 telh in phu an ser. Cu hna cu; Pyithu hluttaw Speaker U T. Khun Myat, Amyotha hluttaw Speaker U Man Win Khaing Than, Pyithu hluttaw Speaker bawmtu U Htun Htun Hein, Amyotha hluttaw Speaker bawmtu U Aye Thar Aung, Pyithu hluttaw palai in Daw Khin San Hlaing, Amyotha hluttaw palai in U Aung Kyi Nyunt le ralkap palai in Bogyoke Taan Soe tiah, an zapi 7 an si.
President a si lai tiah mizapi nih an ruahdamh ciomi U Win Myint sining cu phunghrampi pohmah 59 he aa kalh le kalhlo kha tahfung chektu nih a biapi in an chekfel lai.
Hi pohmah chung ah Daw Aung San Suu Kyi president si khawhnak ding a khamtu pohmah 59(f)nak, “President a si dingmi a fanu, a fapa, a tunu, a tupa hna cu ramdang mi sinak a la lomi an si lai. Cun, hringtu a nu le a pa kha Myanmar rammi an si hrimhrim lai i ku 20 pehtlai in Myanmar ram ah khua a sami a si lai” tiah aa tial.
Hi tahfung pawl he kalhnak a ngei lo, a tlinh ko an ti si ahcun a rauh hlan ah Vice President pahnih Pu Henry Van Thio le U Myint Swe he president an i cuh colh lai tiah theih a si.
Myanmar rampi president thimnak ni caan cu nihin ah tuah liomi ramkomh hluttaw ah fehter le thanh ding in biatung ah aa tel.
About The Author
