Pu Htin Kyaw Cu Hodah Si: Chin Digest

0

Chin Digest Vol. 2/No.2| President Pu Htin Kyaw cu April 1, 2016 thawk in khan Kawlram tuanbia ah a voi 9nak Kawlram president a hong si. Cu hlan Kawlram tuanbia ah President a rak ṭuan balmi minung 8 hna lak ah hin pa (7) cu ralkap hlun lawngte an rak si. A voi hnihnak Kawlram President Dr. Ba U (kum 1952-1957) kha ralkap hlun a si lomi President a rak si i, Pu Htin Kyaw lawng hi Dr. Ba U dih in a voi hnihnak ralkap a si lomi President a si.

Kum 69 a tling cangmi Pu Htin Kyaw cu July 20, 1946 ah khan a rak chuak. Kawl le Mon miphun cawh a si. Aung San Suu Kyi he hin aa ṭhirualmi an si i, an ngakchiat tein aa naihniammi le aa kommi an si. Tleicia Pu Min Thu Wun le Daw Kyi Kyi hna i an fapa pahnihnak a si i, Yangon khualipi ah an rak hrin. A pa [Pu Min Thu Wun] hi mifimthiam pakhat a si i, caṭial lei zong ah minthang a si pin ah 1990 kum ah khan NLD in thimnak ah a rak i cuh i MP zong a rak tlingmi a si.

“anih cu saram cung hmanh ah dawtnak a ngei tukmi a si e..”

1962 Kum ah khan Pu Htin Kyaw cu Yangon in tang (10) a rak awng i, Kawlram pumpi ah a thiam bik pahnihnak a rak si. Tang (10) tiang a rak kainnak sianginn hi Khrifa sianginn Mirangca in ca an cawnnak English Methodist High School timi ah a rak si. Tang (10) a awn dih cun Rangoon Institute of Economics (Rangoon University) ah sipuazi lei cawnnak in sianghleirun a kai.

1968 kum ah Yangon University in cun Master of Economics (M.Eco-statistics) in degree a rak ngah. Mah cu M.Eco a kai pah in cun sianginn cachimtu a ṭuan pah cang. Mah dih hnu in 1970 kum ah an sianginn i computer center ah computer rian programmer lei ah aa ṭhial.

Computer Programmer rian a ṭuan lio ahcun sianginn kai bawmhnak (scholarship) a ngah i Institute of Computer Science, University of London (UK) ah kum (2) chung 1971-1972 tiang computer fimthiamnak a rak cawng. Mah dih cun Tokyo (Japan) ah aa ṭhial i, Asia Electronics Union ah computer cawnnak cu a vung peh. 1975 kum ah Master degree pahnihnak cu Computer fimthiamnak in a ngah chap ṭhan. Mah caan karlak chung (1973 kum) ah Daw Su Su Lwin [atu lio NLD MP] he ṭhit-umnak an tuah. Daw Su Su Lwin a pa U Lwin cu NLD a dirhtu zong ah a rak i tel vemi a si. Daw Su Su Lwin le Pu Htin Kyaw nih hin atu tiang fa an ngei lo.

Sianginn a dihka in Kawlram ahcun a kir i, rianṭuan aa awt. 1975 kum ah Ministry of Industry ah Deputy Division Chief rian a ṭuan. Kum (5) hnu 1980 kum ah ramdang lei chawhlehthalnak pehtlaihnak zung ah Deputy Director a ṭuan. Mah deputy rian a ṭuan chung (1987 kum) ah Athur D. Little School of Management timi sianginn (Cambridge) ah chawlehthalnak lei a va cawng rih. 1992 kum ah a rian cu a dinhtak. Mah hnu khan biatak deuh in Daw Suu he ramkhel lei ah pehtlaihnak an ngei.

Daw Suu a inn ah thong an rak thlak chung vialte ahhin Pu Htin Kyaw hi a lenglei in a rak pehtlaih ngaimi le Daw Suu nih a lenglei minung pehtlaih a duhmi kong ah a rak bawmchan ngaitu a si. 2000 kum ah khan Daw Suu cu a innthong in an rak chuah i, Mandalay ah an vung tlawnnak ah Pu Htin Kyaw nih cun a rak zulh. Mah nak cun ralkap nih an tlaih i, thla 4 chung thong an rak thlak bal. Mah cu ramkhel he pehtlai in thong a rak tlak balnak a si ve. Daw Suu zong mah cu tlawmpal ahcun a inn ah thong an thlak ṭhan colh ve.

Kum 2012 kum ah khan Daw Suu le NLD pawl nih an dirhmi Daw Khin Kyi Foundation ah Pu Htin Kyaw chairman a ṭuan i, President a si hlan chung tiang kha a ṭuan. Pu Htin Kyaw cu NLD party chung ahhin a lutmi a si lo pin ah kan hnu 2015 thimnak zong ah khan aa telmi a si lo. Asinain president min cazin an thanh hlanpi khan Daw Suu nih Pu Htin Kyaw hi a mizumh le aa bochanmi a si caah President a thim lai tiah thawngpang a chuak bikmi a si. Thawngpang a chuahcia ning tein Daw Suu nih cun a thimmi a hong si taktak.

Pu Htin Kyaw cu President a si cangka in Kawlram mizapi nih cohlanmi le uarmi a si colh. Ralkap MP pawl belte nih cun “Pu Htin Kyaw hi mipi nih thimmi MP a si lo” an ti i, chikkhat cu an doh hrulhralh nain a tlamtling lo. Kawlram mi tam bik nih zumhmi Pi Aung San Suu Kyi nih a zumh bikmi minung a si caah a dang zapi tu nih cun an cohlan dihnak hi a si.

A upa Pu Nyan Soe nih Pu Htin Kyaw kong an hal lio ah “anih cu saram cung hmanh ah dawtnak a ngei tukmi a si e” a ti. Cun amah [Pu Htin Kyaw] he rian a rak ṭuan balmi si hna seh, thong a rak tlaṭimi a hawilei vialte zong nih Pu Htin Kyaw cu mi dingfel le zohchunh awk tlak a si tiah an thangṭhat.

Chirhchanh: 7Days, The Voice, VOA, Wikipedia

Theithernak: Hi capar, President U Htin Kyaw kong tawi cu Chin Digest Vol.2/No.2, April 2016 chuahmi ah telhmi a si. Chinland Post le Chin Digest online careltu siaherhnak he kan hun thlah than.~Editor 

About The Author

Na ruahning rak langhter ve.. (Leave a comment)

%d bloggers like this: