Ramkomh Fimcawnnak Minister Dr. Myo Thein Kyi Cu Tanghra Camipuai Phimi Zoh Ah Hakha A Ra Lai
City Hunter| 2018 March 13| M yanmar ramkomh fimcawnnak minister Dr. Myo Thein Kyi cu tanghra camipuai a phimi zoh ah March 14 Hakha a phan lai tiah kan theih.
“Ramkomh fimcawnnak lei minister Dr. Myo Thein Kyi cu March 14 khi Hakha an phan lai. Tanghra a phimi zoh le vehvat ah rat aa timh hi a si. Amah lawng si lo in fimcawnnak zung in lutlai cheukhat zong nih zulh an timh. March 14 zan khi Hakha ah a riak lai. Ramdang khualtlawn ding a ngeih caah Chinram khualipi Hakha lawng a zoh lai i March 15 khi Pakukko lei in a kir lai” tiah Chin ramkulh Ngandamnak le Fimcawnnak (Social Affair) Minister Pau Lun Min Thang nih The Chinland Post ah a chim.
NLD cozah thar kai hnu in tu lio Myanmar ramkomh fimcawnnak lei minister Dr. Myo Thein Kyi hi Chinram voihnih a tlawng cang. Tutan hi avoi thumnak a rak tlawn a si lai tiah kan theih.
2018 March 7 ah thawkmi Myanmar ram pumpi tanghra camipuai ah Chinram in camipuai a phi dingmi zapi hi 11,741 an si. Hi chung ah siangngakchia 1574 nih camipuai an phit lo caah zatuak in tukum Kawlram chung tanghra camipuai a phit lo in a bau bik mi cu Chin ramkulh kan si, zatuak 86.59% lawng an si.
March 7 ah thawkmi Myanmar rampi tanghra camipuai a phi dingmi zapi hi 844,358 an si i a nikhatnak camipuai a phimi zapi hi 788,863 lawng an si. Myanmar rampi huap in camipuai phit lo in a baumi zapi hi 55,495 an si.
About The Author
