Shadaw Khua Karenni Dothlennak Phu Nih An Lak, Ralkap 40 Leng An Tlaih Hna

0

The Chinland Post | 2024 February 14 — Shadaw khua cu Karenni dothlennak phu pawl nih tlamtling tein an lak dih khawh i ralkap 40 leng an tlaih hna tiah KPLA nih an thanh.

“Dothlennak phu pawl nih kan lak cang. February 12 ah kan lak khawh hi a si” tiah KPLA in Second Battalion Commander nih Mizzima ah a chim.

Kahdohnak chung ah hliamhma he an tlaih mi SAC Tactical Operator (byuha hmu) zong a thi tiah thawngpang a leng nain kan fehter kho rih lo tiah Mizzima nih a chim.

Thai he ramri aa pehnak Karenni ram, Shadaw khua um ralkap sakhaan pawl cu KA, KPLA, KNDF le PDF pawl nih 2022 thawk in an kah lengmang.

Kahdohnak pawl chung in ralkap sakhaan zapi an lak khawh cang i khua laifang pura ah hmunhma an khuarnak sakhaan pakhat lawng a tang cang tiah KNDF lei nih January 28 ah an rak thanh cang. A hnu bik a tang mi khua laifang sakhaan cu February 12 ah an lak khawh caah khua ning in an lak khawh tiah KPLA nih February 13 ah thawng an thanh ve.

SAC ralkap 40 leng an tlaih hna i hriam tampi zong an lak khawh tiah cathanh ah an langhter.

Karenni ram um khua 11 chung ah Mese, Ywathit, Mawchi, Nan-me-khung, Shadaw khua hna cu Karenni dothlennak phu pawl nih a zapi in an lak khawh cang.

Karenni ram ah 2023 November 11 in an thawk mi Operation 1111 ah Lokaw ROC cu a kulh khawh dih cang i khua hmunhma cheu 3 cheu 2 leng cu an lak khawh cang, Karenni he ramri aa tlaihnak Shan ram thlanglei Moebye, Pekon khua luhchuahnak cu dothlennak phu pawl nih an tlaih khawh cang i Shan ram-Karenni ram, Hsihseng khua chung zong dothlennak phu pawl nih hmunhma an khuar dih cang tiah KNDF nih an thanh.

About The Author

Na ruahning rak langhter ve.. (Leave a comment)

%d bloggers like this: