CDF-Kanpetlet le SAC ralkap karlak ah ni 5 chung kahdohnak a chuak
The Chinland Post | 2022 June 14 – Chin ramkulh, Kanpetlet peng ah SAC ralkap le CDF-Kanpetlet karlak ah kahdohnak a chuak lengmang tiah CDF-Kanpetlet nih a thanh.
CDF-Kanpetlet le SAC ralkap cu June 9 in kahdohnak a thok i June 12 tiang kahdohnak aa peh tiah a langhter.
June 12 ah kahdohnak a chuak i, Kanpetlet peng, Anpung khua ah a ummi SAC ralkap pawl nih Anpung khua mipi inn an bauh i thilrii hna an fir. An ratnak lam in an kir lioah CDF hriamtlai phu he kahdohnak a chuak ṭhan.
Cu kahdohnak ah CDF hriamtlai 1 a lu ah hliamhma a pu i SAC ralkap lei in a thimi le hliam a pumi zat a fiang in theih a si rih lo tiah a thanh.
CDF-Kanpetlet le SAC ralkap karlak ah June 9 in kahdohnak aa thok i June 10 ah CDF-Kanpetlet battalion 2 sakhaan cu SAC ralkap nih thazang tampi in an rak lak. CDF-Kanpetlet nih cuka hmunhma ah a ummi SAC ralkap pawl cu an kal hnawh hna i an kah hna, Kanpetlet khuachung ah kahdohnak hna an tuah i SAC ralkap lei in a thimi an tam tiah theih a si.
About The Author
