Saw Peng, Laungshay Hmunhma Kahdohnak Ah SAC Ralkap 80 Nak Tlawm Lo An Thi, Mipi Hriamtlai 5 An Nunnak A Liam
The Chinland Post | 2023 July 18 — Magway ramṭhen, Gangaw pengkomh, Saw peng, Laungshay hmunhma in Cinduai khua lei ah a kai mi SAC ralkap mawṭaw pawl cu bomrap an puah hnawh hna, Rocket in an kah hna caah SAC ralkap 80 nak tlawm lo an thi tiah NUG Ministry of Defense nih thawng a thanh.
July 16 ah Laungshay hmunhma in Chin ramkulh, Cinduai khua lei ah a kai mi SAC ralkap mawṭaw pawl cu Masatui le Luailaycin khua karlak lamkuihnak ah bomrap an puah hnawh hna i 50 nak tlawm lo an thi, hliam a tuar mi zong an um caah SAC nih vanlawng 2 in bom a rak thlak.
Kahdohnak chung ah Gangaw pengkomh B03, B05, B06, Magway pengkomh B01, Minbu pengkomh B01, B03, B04, B06, Salin PDF, CDF-Kanpetlet, Khonu battalion hna bawm in kahdohnak an tuah i hliam a tuar mi ralkap pawl hi Laungshay ah an kirpi hna tiah NUG MOD nih a langhter.
Cubantuk in July 18 zinglei ah SAC ralkap mawṭaw pawl cu Yinke khua pawng ah mipi hriamtlai phufonh nih Rocket bawm in an kah ṭhan hna caah 30 nak tlawm lo an thi tiah theih a si.
Kahdohnak voi 2 chung ah SAC ralkap 80 nak tlawm lo an thi i mipi hriamtlai phufonh lei 5 an nunnak a liam tiah theih a si.
About The Author
