Khua Dihlak Mei Khangh A Tong Mi Rialti Khua
Salai Mangpau | July 20, 2023 |
Falam Municipal (Sipin) area chungtel a si mi Falam khua in meng (8) aa hlatnak lungpi veng (Rialti) khua cu Falam-Hakha lam pi a ummi a si. Khuachung inn dihlak 12, Milu 70 hrawng an umnak khua te a si. SAC nih uknak a lak hnu February 1, 2021 thawk in ralhrang cu Chinram an rak kai caan poah khuachung ah hriamngan kah in an lut tawn. Khuachung ah meithal an thlah tawn tik ah khuachung mipi nih khua an chuak tak lengmang mi khuate a si.
Ralhrang An lutnak
Rialti khua hi Falam peng chung um a si bantuk in SAC ralhrang rual khuachung an lut lengmang i, August, 2021 ah ralhrang voi 3 nak tam khuachung an luh caah khua an chuahtak.
2021, August 1 -15 ni tiang ah Falam peng-Falam-Hakha lam ah Ralhrang an rak kai caah Rialti khua um mipi cu an mah khua he naihniam bik Falam khua le pawngkam khua ah an zaam. Cheukhat ramlak ah an tli/an zaam.
2021, October 13-14 ni Falam- Hakha lam kahdohnak ah Ralhrang nih Rialti khua cu voi 2 an khangh. Biakinn le Pastor quarter telh in khuami inn vialte an khangh dih. Mei kang mi inn le lo hi kyat sing 4712(471,200,000) man hrawng a si lai tiah theih a si. Biakinn telh in inn 4 an khangh. Kalay in a rak kai mi SAC ralkap nih Falam Peng Riallti khua Khrihfa Biakinn telh in inn 4 mei in an khangh, An khanghnak khua hi Hakha le Falam kar khua a si i minung tlawmte (inn 12 hrawng) an umnak khua a si. Nihin October 13, zaanlei 3:15PM hrawng ah khan SAC ralkap nih mei in an khangh hnu in khua mi hmun kip an zaam.
Ralruang Ah Harsaknak Dang Tonmi
SAC ralhrang ruang ah mipi nih hman tawn mi phone line, internet line an khar lengmang ruang ah mipi eidin le zatlang nun an harsa ngai. Sianginn an khar. Biaknak lei he aa pehtlai mi puai le pumhnak an tuah kho ti lo hlei ah Covid ral nih a tlak hna. SAC ralhrang an kai caan paoh ah mipi um kalnak lam an khar lengmang tiah theih a si.
Cherhchannak: Institute of Chin Affairs
About The Author
