Yangon khuachung Zuu Zuarnak Hmun le Restaurant Dawr kip ah SAC Sermi Beer Zuu le Thilri Dang Zuar Ding In Hramhram In An Fial Hna
Salai Mangpau | September 14, 2023 — Yangon khuachung ah Store, Mini Store, Restaurant le thildang zuarnak Center dawr kip ah SAC chuahmi Beer, zuu le thilri dang zuar ding in Municipal (Sipin) lei nih dawr ngei tu hna sin ah hramhram in an fial hna tiah theih a si.
September 13 zaanlei ah SAC ralkap le Municipal (Sipin) rianṭuantu pawl cu Yangon khualaicer Tuluk dawr tlar 19 lam chung an rak lut i, thilzuar mi an tlaih, cun Tuluk Restaurant dawr chung lut in SAC ser mi Beer, Zuu,Kuak le thilri dang pawl zong zuar ding in an fial hna.
September thladongh zarh lei ah Yangon khuachung restaurant le Store dawr kip an hun zoh ṭhan te lai i, mah tik caan ah SAC ser thilri a zuar lo mi cu dantat an si lai tiah Khit Tit Media nih a ṭial.
Khuapau dohthlennak hnu ah SAC ser mi thilri hman lo, cawk lo ding in mipi nih duhlonak an langhter hnu in SAC lei nih an ser mi thilri zuar ding in khuachung dawr kip ah General Administration zung, Municipal (Sipin) le Police hna nih an fial ve hna hi a si.
SAC ralkap business tangka hmuhnak 70% ah ralkap ser Myanmar Beer, Zuu, Kuak telh in thil phun 8 cu ramchung mipi nih hman ti lo in khap (boycott) tuah cio ding in khuapau dohthlennak a tuah mi hna nih an chim.
Myanmar Beer telh in an serchuah mi thil phun 8 pawl cu Myanmar ram chung mipi nih cawk le zawrh khap ( boycott) ding mi ralhrang ser thil hna cu-
- Myanmar Beer
- (Andaman Gold) min Zuu, Beer, Cold Drink
- (Dagon) min Zuu, Beer, Cold Drink
- (Mandalay) Beer, Rum
- (Black Shield Stout)
6 (Army Rum)
7.Red Ruby kuak
- Premium Gold kuak
“Pakhatnak ah SAC ralhrang business hrampi a simi Zuu, Beer le Kuak pawl an si. Mah Zuu le Kuak in hmuh mi tangka a tam tuk. Ralhrang nih mipi tangka in Hriamnam, Kuan, Zen, Bomb an ser, mipi thatnak ah an hman ṭhan caah mipi vialte an kan thahnak hrampi a si mi ralhrang ser Zuu, Beer le Kuak cu boycott tuah cio hna u sih. A ra lai ding thla 2 chung ah ralkap ser thil phun 8 business 70% a tla/zor ding in timhtuahnak ngeih a herh” tiah khuapau dohthlennak aa tel mi Dr. Tay Zar San nih a chim.
About The Author
