Kalaymyo Thlanglei Ah Kahdohnak A Fak, Mipi ralkap 2 le Hriamngan Ruangah Siaphu khua Minung 5 An Thi
Salai Mangpau | September 28, 2023 —
Kalaymyo peng ah SAC ralkap le mipi ralkap tangṭi phu hna nihnih chung kahdohnak a fak ngai i khaphnih lei in a thi mi an tam. Mipi ralkap lei in minung 2 le SAC lei hriamngan ruang ah Siaphu khuami 5 an thi tiah theih a si.
September 26, zinglei sml 8:00am ah Kalaymyo thlanglei, Kalay in meng 30 hrawng aa hlatnak Aungthayar khua ah SAC ralkap le pyusawhti phufonh thazang 100 le mipi ralkap hna karlak ah minute 30 hrawng kahdohnak a chuak tiah CDF-KKG nih thawngthanhnak an tuah.
Kahdohnak ah SAC lei nih hriamngan in an kah an bawmh hna, SAC lei ralkap 2 an thi, CDF-KKG rakap pakhat le Kalay (ba-kah-pah)in pakhat nih ram caah an nunnak an pek.
Chun suaimilam 1:00pm hrawng ah Aungthayar nichuah sang ah hmunhma a la mi SAC le Pyusawhti rual cu CDF- KKG le Kalay District battalion 4 phufonh nih an kah ṭhan hna i CDF ralkap 2 hlaim an tuar tiah CDF-KKG nih an chim.
September 27 ni ah Aung Thar Yar khua in Hmandaw khua lei ralhmaisual a rak kai mi SAC le Pyusawhti phu le mipi ralkap cu Hmandaw khua pawngah kahnak a um than. Mah kahnak ah SAC lei an fak ngai, CDF ralkap hliam a tuar mi pakhat a um tiah CDF-KKG sin in theih a si.
SAC ralkap nih kahdohnak a chuahnak khua pawngkam mipi inn pawl an khangh, hriamngan in an kah ruang ah Siaphu khuami 4 an thi tiah a hmutu hringtu nu pakhat cu a lau tuknak ah a thi chap tiah CDF-KKG nih an chim.
Nihin SAC ralkap le pyusawhti rual kahdohnak ah CDF-KKG, Kalay District battalion 4, Kalaymyo peng (Ba-kah-pah), CNDF (Thai Pau) phu pawl an tangṭi hna.
Kalaymyo thlanglei ah kaphnih karlak kahdohnak a fah caah phone line zong SAC lei nih an phih tiah theih a si.
About The Author
