Mon le Karen Ram I KNU Phufonh Pawl Kahdohnak Ah SAC Ralkap 40 Leng An Thi
The Chinland Post | 2023 September 28 — KNU kuttang ralkap pawl telh in dothlennak phufonh pawl nih an tuah mi kahdohnak dirhmun cu Special Operation Force nih a thanh.
August 12 ah Zinkyaik hmunhma palek sakhaan in palek Htun Naing Lin an thah khawh i August 27 ah Pauk peng khuabawi zung ah hmunhma a khuar mi SAC ralkap pawl an kah hna i Major Kyaw Naing Oo telh in ralbawi le adang 5 an i hliam i 2 cu sizung ah an thi.
August 28 ah Paung peng, Tabyuchaung khua SAC kuttang pyusawthi hruaitu Aung Ngwe Htun an kah i a thih le thih lo a fiang in theih a si lo.
KNU Brigade 6 hmunhma ah S.O.F nih KNLA, Cloud Wings 3 Drone phu hna bawm in Kwilone sakhaan cu August 24 in September 14 tiang ni 20 leng an kah hna i an lak beh.
Kahdohnak chung ah SAC ralkap 10 nak tlawn lo an thi tiah an thanh.
Kwilone sakhaan ah riahcaw le hriam pawl a rak chan mi SAC ralkap 100 hrawng cu lampi ah an kah hna i an zaam.
Cu a zaam mi ralkap chung in 10 hrawng cu tiva an tan lio ah an kah ṭhan hna i an ruak pawl tiva ah a vuan tiah S.O.F nih an thanh.
September 18 zong ah SAC ralkap pawl an rak luh ṭhan caah chunitlak kahdohnak a fak i SAC ralkap 20 leng an thi i mipi hriamtlai lei 1 a nunnak a liam ve.
About The Author
