CDF-Mindat Caah AK-47 Zuun 40 le Kuan 12,000, Kuanbawm 120 Hrawng An Bawmh Hna
The Chinland Post | 2023 October 3 — Chin ramkulh, Mindat hrambunh CDF-Mindat caah AK-47 meithal zuun 40 le kuan 12,000, kuanbawm 120 hna cu phu 3 i bawm in an bawmh khawh hna tiah International Mindat K’Cho Organization (IMCO) nih thawng a thanh.
International Mindat K’Cho Organization (IMCO), Heal the World le CEA (Norway) phu 3 nih AK-47 meithal zuun 40, kuan 12,000, kuanbawm 120 hna an cawk i CDF-Mindat sin ah September 28 ah an ap hna tiah theih a si.
International Mindat K’Cho Organization (IMCO) phu nih CDF-Mindat caah AK-47 zuun 50 bawmh khawh nak ding Project cu 2022 June thla in an thawk i USD $ 185,000 a dih ding meithal zuun 5, kuan 15,000, kuanbawm 150 hna an hmuh cang tiah theih a si.
Project caah Lottery in Fund an kawl i USD $ 7, 072 an hmuh cang nain dothlennak phu pwl nih lakhruak in an herh mi eidin pawl an bawmh hna caah a tang mi USD $ 58,749.40 cu Project caah an hman.
Dr. A Nyein hruai mi Heal the World phu le CEA (Norway) hna nih USD $ 35,000 hrawng an bawmh ve hna caah a herh mi Fund a tam deuh cu IMCO phu pawl nih thla fatin in an kholh mi in an chap bantuk in a tang mi AK-47 zuun 10, kuan 3,000, kuanbawm 30 hna zing chikhat ah an hmuh colh.
Atu Project ah teltumnak in bawmhnak a pe mi ramchung ramleng Myanmar rammi hna, Dr. A Nyein hruai mi Heal the World phu chungtel pawl, CEA (Norway) phu chungtel pawl leng ah hriam cawknak ah a hramthawk in a dongh tiang bawmhnak a petu NUG, ramkip IMCO upa pawl, him tein hriam a va phor mi CDF-Mindat hriamtlai pawl, dothlennak caan chung vialte thla fatin in tangka a tho mi IMCO chungtel, K’Cho phungning tein hriam apnak ah a herh mi sia 3 a hlutu IMCO (Europe), IMCO ( U Om Phe – American), IMCO (Europe) cung zong ah lunglawmhnak tampi kan ngei tiah an lunglawmhnak zong an langhter chih.
About The Author
