Karenni Hmunhma Kahdohnak Ah Hriam Phun 40 Leng Kan Lak Khawh Tiah KNDF Nih Thawng An Thanh
The Chinland Post | 2023 October 4 — Karen (Karenni) ram chung, September thla chung ah a cang mi kahdohnak pawl ah SAC ralkap meithal (Rifle) zuun 36 le hriamngan zuun 5 cu Karenni hriamtlai phufonh pawl nih an lak khawh tiah KNDF nih thawng a thanh.
Karenni ram ah KNDF aa telnak kahdohnak hi voi 29 a cang i cu chung ah atu bantuk in hriam pawl an lak khawh hi a si i SAC ralkap mawṭaw 2 zong an khangh khawh tiah cathanh chung ah an ṭial.
SAC ralkap pawl nih an riahcaw phor mawṭaw pawl an umkal khawh nakhnga caah lamsial in kahdohnak an tuah hi a si i Loikaw, Demoso, Hpruso le Bawlakhe peng hna ah September thla chung, nifatin ngawt in kahdohnak a fak tiah theih a si.
Demoso in meng 3 aa hlatnak ah a um mi Pupha le Thaesulay ah hmunhma an khuarnak SAC ralkap sakhaan 2 cu KNDF phufonh nih September 2 ah an lak khawh.
Kahdohnak chung ah SAC ralkap hman mi Rifle zuun 15 an lak khawh i SAC ralkap pawl tu cu an zaam dih tiah an langhter.
SAC ralkap lei nih kahdohnak a can lio le a dih hnu zong ah vanlei kahdohnak voi 20 a tuah tiah an langhter.
Kaphnih karlak kahdohnak chung ah SAC lei 78 an thi i 5 a nung in an tlaih hna tiah theih a si.
Thlakhat chung kahdohnak ah KNDF chungtel 8 telh in Karenni hriamtlai phufonh lei 10 nak tlawm lo nih ram le miphun caah an nunnak an pek tiah an langhter.
SAC ralkap nih kahdoh a chuahnak hmunhma he aa hlatnak ralzaam camp hna ah vanlawng in bom a thlak, hriamngan in a kah caah mipi 7 an i hliam i 1 a thi tiah KNDF thawngthanhnak in theih a si.
About The Author
