Kalaymyo Ni 5 Chung Kahdohnak Ah Ralhrang 9 An Thi
Kalaymyo Ni 5 Chung Kahdohnak Ah Ralhrang 9 An Th
The Chinlandpost | October 4, 2023 —
Kalaymyo thlanglei ah ralhrang pawl nih Operation an ngei i khuachung inn an bauh, tualchung mi an tlaih hna caah mipi ralkap pawl he ni 5 chung kahdohnak a chuak i ralhrang 9 an thi.
Ralhrang nih Kalaymyo thlanglei hmunkip ah an thazang chap ding in an minung an kuat lengmang. Aungthayar, Myohla, Hmuntha le Sekan khuapawng ah September 26 in October 3 kahdohnak a fak. Ralhrang an kir dih rih lo ruang ah thawngpang a thar rih lo.
September 26, zinglei sml 8:00am ah Kalaymyo thlanglei, Kalay in meng 30 hrawng aa hlatnak Aungthayar khua ah SAC ralkap le pyusawhti phufonh thazang 100 le mipi ralkap hna karlak ah minute 30 hrawng kahdohnak a chuak tiah CDF-KKG nih thawngthanhnak an rak tuah.
Kahdohnak ah SAC lei nih hriamngan in an kah an bawmh hna, SAC lei ralkap 2 an thi, CDF-KKG rakap pakhat le Kalay (ba-kah-pah) in pakhat nih ram caah an nunnak an pek.
Chun suaimilam 1:00pm hrawng ah Aungthayar nichuah sang ah hmunhma a la mi SAC le Pyusawhti rual cu CDF-KKG le Kalay District Battalion 4 phufonh nih an kah ṭhan hna i CDF ralkap 2 hlaim an tuar tiah CDF-KKG nih an chim.
September 27 ni ah Aungthayar khua in Hmandaw khua lei ral lam sial in a rak kai mi SAC ralkap, pyusawhti phu le mipi ralkap hna cu Hmandaw khua pawng ah kahdohnak a um than. Mah kahnak ah SAC lei an fak ngai, CDF ralkap hliam a tuar mi pakhat a um tiah CDF-KKG sin in theih a si.
Ralhrang le mipi hriamtlai phu karlak, Myohla le Hmuntha pawng kahdohnak hnu ah SAC ralkap nih an operation kalpi an timh peng rih. Tualchung mipi ralzaam an um.
Ni 5 chung kadohhnak ah mipi ralkap CDF-KKG Battalion (4) in Aung Kyaw Tu le (Pah-kah-phah) in 1 an nunnak a liam.
Ralhrang kut in Aungthayar khua ah mi pakhat le September 27 Siaphu khua inn bomb thlak ruang ah Mg. Zay Yar Lin- Kum 15, Mg Tha – Kum 33, Mg Soe Soe – Kum 34, Ma Moe Moe – Kum 40 chungkhar an thi tiah theih a si.
SAC ralkap nih kahdoh a chuahnak khua pawngkam mipi inn pawl an khangh, hriamngan in an kah ruang ah Siaphu khuami 4 an thi tiah a hmutu, hringtu nu pakhat, cu a lau tuknak ah a thi chap tiah CDF-KKG nih an chim.
Nihin SAC ralkap le pyusawhti rual kahdohnak ah CDF-KKG, Kalay District battalion 4, Kalaymyo peng (Ba-kah-pah), CNDF (Thai Pau) phu pawl an tangṭi hna.
Kalaymyo thlanglei ah kaphnih karlak kahdohnak a fah caah phone line zong SAC lei nih an phih tiah theih a si.
About The Author
