SAC Ralkap Nih Kumkhat Chung Ah Mipi A Bu In An Thah Mi Hna Chung Ah Chin Miphun Minung 14 An I Tel
The Chinland Post | 2023 October 5 — Hramhram in uknak a latu SAC nih kumkhat chung ah Chin miphun telh in Myanmar ramchung ah mipi a bu in voi 40 leng a thah hna i Chin ramkulh chung zong ah a bu in minung 14 an thi tiah zatlang phu pakhat nih a thanh.
Chin ramkulh ah mipi a bu in thahnawnnak hi voi 2 a cang i Thantlang peng, Matupi peng hna ah a cang i minung 14 an thi tiah theih a si.
Thantlang peng, Khuafo khuate ah, 2023 March 30 ah SAC nih vanlawng in bom a thlak ruang ah kum 10 tang hngakchia 2 telh in minung 8 an thi i minung 20 hrawng an rak i hliam.
A luancia 2022 April in 2023 March thla tiang ah SAC ralkap nih miung 5 cung a bu in thahnawnnak hi voi 44 tiang a buar tiah BNI-Myanmar Peace Monitor nih October 5 ah Report a langhter.
Mipi a bu in thahnawnnak hi Sagaing ramṭhen ah voi 15 in a tambik a cang i Mandalay, Magway le Kachin hna ah voi 4 cio a cang.
Chin, Mon le Rakhine hna ah voi 2 cio le Shan ah voi 1 a cang tiah theih a si.
Atu an langhter mi report ah 2022 March hlan lio caan le 2023 March hnu ah a cang mi a bu in mi thahnak pawl aa tel rih lo tiah an langhter.
Hmanthlak: 2023 March 30 ah SAC nih vanlawng in Khuafo khuate ah bom a thlak ruang ah a nunnak a liam mi cheukhat (hmanthlak hlun)
About The Author
