SAC Ralkap Nih September Thla Chung Ah Vanlei Kahdohnak Voi 20 Leng A Tuah Tiah TNLA Nih A Thanh
The Chinland Post | 2023 September 6 — Ta’ang National Liberation Army (TNLA) le SAC ralkap karlak, September thla chung ah kahdohnak voi 40 leng a chuak i SAC ralkap nih vanlei kahdohnak voi tampi a tuah khun tiah TNLA nih a thanh.
A luancia September thla chung ah TNLA le SAC ralkap pawl cu Muse peng, Kutkai peng le Mogok peng hna ah voi 41 an i kap tiah a langhter.
Muse peng Selan, Makan, Saikaung, Nahtan, Kaungyar, Nantaung, phaphi, 105 Mile, Lwaikyelauk, Lwainaw tlang pawng hna ah kahdohnak a chuak i SAC ralkap, pyithusit phufonh nih TNLA hmunhma khuarnak lei ah kahdohnak an tuah, TNLA lei nih an rak kah ṭhan ve hna caah kahdohnak a fah hi a si.
SAC ralkap vanlei kahdohnak le hriamngan kahdohnak ruang ah mipi inn pawl a rawk, bom nih a khen hna i hliam tuarnak le kum 11 tang hngakchia telh in minung 5 nak tlawm lo an thi tiah TNLA cathanh nih a langhter.
SAC ralkap vanlei kahdohnak, hriamngan kahdohnak ruang ah mipi 600 leng an zaam i biaknak lei inn, fimcawnnak sianginn le mipi inn a rawk mi zong a um.
TNLA le SAC ralkap karlak ah July thla thawk in kahdohnak a chuak cang i SAC ralkap sin in hriam pawl zong an lak khawh tiah TNLA cathanh ah hmuh khawh a si.
SAC ralkap le TNLA karlak ah 2022 kum dongh lei in Nansanyan peng, Konethar khua pawng ah kahdohnak a fak. Kahdohnak chung ah SAC ralkap nih vanlei kahdohnak voi 60, hriamngan kahdohnak voi 38 le 500lb a rit mi Cluster Bomh lung 14 hmang in kahdohnak a tuah. Cu lio zong ah mipi inn 50 a khen i a rawh leng ah khuami 1,400 leng an zaam tiah TNLA thawngthanhnak in theih a si.
About The Author
