Pakokku, Nyaung U, Ayadaw Ah A Um Mi Pyusawthi Khua 5 le SAC Ralkap Sakhaan Kahdohnak Ah SAC Ralkap 11 An Thi
The Chinland Post | 2023 October 6 — Magway ramṭhen, Pakokku peng, Mandalay ramṭhen, Nyaung U peng le Pakokku pengkomh Ayawdaw Yenanmay ah a um mi SAC ralkap sakhaan le khuate 5 kahdohnak ah SAC ralkap le pyusawthi 11 an thi tiah Myaing PDO nih thawng an thanh.
September 30 ah Pakokku peng ah a um mi pyusawthi pawl nih an uknak Yuathit khua, Taungyuawa, Myaukyuwa, Yenanchat, Oakkyaung khua 5 cu PDF phufonh nih an kah hna. Yuathit khua, Oakkyaung khua le Yenanchat khua hna cu chikhat PDF pawl nih an tlaih khawh, PDF pawl nih khuate chung ah NUG cozah cohlan ding le PDO dirh ding in cawnpiaknak zong an tuah tiah theih a si.
Khuate pawl kahdohnak chung ah SAC Brigade 88 kuttang ralkap 1, pyusawthi 4 tiah an zapi 5 an thi i 5 an i hliam i SAC ralkap thuam le kahdohnak thilri pawl zong an lak khawh tiah theih a si.
Bawmhnak pek ding in a rak kai mi SAC tilawng 5 zong an kah hna i tilawng 3 a rawk, SAC ralkap a thi mi an um lo nain PDF 2 thinphan awk um tuk lo in an i hliam tiah theih a si.
Cubantuk in October 1 ah, Mandalay ramṭhen, Nyaung Oo peng, Yuanaung khua ah a um mi pyusawthi hruaitu Phoe Zin a inn cu bom lung 6 an thlak hnawh i vanlawng hme pakhat zong an sung tiah Myaing PDO nih an thanh ve.
October 2 ah Pakokku pengkomh, Ayadaw Yenanmay ah SAC ralkap pawl nih hmunhma an khuarnak cu Drone a ngan mi in bom lung 20 an thlak hnawh i SAC ralkap 4 an thi, a thi mi ralkap pawl cu tilawng in Bagan-Nyaung Oo lei ah an kalpi hna.
October 3 ah Pakokku peng ah a um mi pyusawthi khua 3 cu Drone in bom lung 40-50 kar an thlak hnawh hna i SAC ralkap a thi mi an um, October 4 ah Wazi khua pawng ah a um mi SAC ralkap gate cu Energa bomb lung 20 an thlak hnawh hna i SAC ralkap 2 an thi tiah theih a si.
About The Author
