Paletwa Peng SAC Brigadier General Ralbawi Pakhat A Thliknak Ah An Tlaih
The Chinland Post | January 13, 2024 — Chin ramkulh, Paletwa peng um SAC Military Operation Commander No. 19 commander cu January 12 zing ah Arakan Army AA nih an tlaih tiah theih a si.
AA ralkap nih sakhan laknak ah kahdohnak a tuah mi zualhma chin ruang ah ralram in tlik ding in aa tim mi MOC commander Zin Myo Shwe cu ralram ah kan tlaih tiah AA ralkap thawngzamhnak in theih a si.
Brigadier General Zin Myo Shwe tlaihnak kong he pehtlai in AA lei nih thilsi ning fiang tein an chim rih lo.
Chaklei Shan ram Nantsan peng ah SAC LIB 101 commander Brigadier General Min Min Tun zong TNLA nih kan hnu thla December ah an rak tlaih ve.
Paletwa peng um AA nih SAC sakhan lak kahdohnak an tuah mi a zualhma chin i unau hawikom phu 3 lei zong nih thawngthanhnak an tuah.
Tlaih a tong mi Brigadier Min Min Tun nih SAC hruaitu Senior General Min Aung Hlaing le Vice-Senior General Soe Win telh in SAC hruaitu vialte cu Myanmar ram mi hna cung i an tuahsernak ṭha lo ngol dih ding in Brigadier Min Min Tun nih a nawl hna.
Ralkap phung a buar mi SAC ralkap hruaitu Senior General Min Aung Hlaing, Vice-Senior General Soe Win le ralkap hruaitu vialte nih Myanmar ram mi cung ah an tuahsernak ṭha lo vialte cu ngol dih ding in Ta’ang ralkap TNLA nih an tlaihmi Division 101 ralbawi Brigadier nih January 10 ni ah Media sin ah a chim.
Shan ramkulh chaklei, Laukkai khuapi um SAC Brigadier le Colonel rank ralbawi 6 nih Kokang ralkap MNDAA sin ah an hriamnam an chiah i, ral kut i an i ap ruang ah le cunglei nih nawlpek mi an tlamtlinh lo ruang ah phungning tein thonginn ah hren in dantat an si tiah Naypyidaw um SAC ralkap lei media sin in theih a si.
About The Author
