Kalaymyo ဖိုးလမင်းမုန့်တိုက်-Pholamin Changreu Dawr Ah SAC Ralkap Nih An Luhhnawh Hna
The Chinland Post | January 17, 2024 — Kalaymyo, Pinlone sang Lamsung ဖိုးလမင်းမုန့်တိုက်-Pholamin changreu dawr cu Janauary 16 zaan ah SAC ralkap nih an luh hnawh hna. Dawr ngeitu le riantuantu le thilcaw mi 15 nak tlawn lo cu an tlaih hna tiah thawngtheih a si.
“Lamsung ဖိုးလမင်းမုန့်တိုက်- Pholamin dawr an luh hnawh. Thil caw mi mino pakhat zong aa tel, tlaih a tong mi cu an velh chih hna hnu ah dawr ngeitu Daw Htey Sein telh in minung 15 an tlaih hna hi zaanlei sml 3:00pm ah a si” tiah khuachung mi a hmutu hna nih an chim.
An tlaih mi hna cu Kalaymyo Regional Operation Command-ROCဒေသကွပ်ကဲရေးစစ်ဌာနချုပ် – ဒကစ ah an kalpi hna.
“SAC lei nih PDF an si tiah mi sawhsawh khan an puh lengmang hna. Atu bantuk in minung an tlaihnak hna hmun hi changreu dawr a si. K Pay, Wave Money an tuah. Tangka luhchuahnak an phih duh ruang ah a si ṭheu lai. Cun mah changreu dawr ngeitu hi mirum an si caah tangka hal an duh zong a si kho ko” tiah khuachung mi min langhter duhlo mi nih an chim.
SAC ralkap nih Kalaymyo khuachung gate tuah in tualchung mipi umkal mi tangka hal, an duh le meithal in kahnak an tuah pah lengmang. Kalaymyo khuachung City townhall, Natchaunglam, Aungtitsa Bungtawlam, Tahan sang Neciatheik hmai, Letpanchaung lam ah gate an tuah i tualchung mipi tangka hal in an duh paoh in an um hnawh hna tiah theih a si.
SAC nih uknak a lak hnu in Kalamyo ah ralkap nih tlaih mi mipi 1,300 leng an si, cheukhat cu thong an thlak hna, cheukhat ROC ah bia an hal hna, Peng palek sakhan, Pengkulh biaceihzung le thonginn ah an hren lengmang hna tiah dohthlennnak mipi ralkap bu pawl nih an chim.
About The Author
