Lailenpi Sakhaan Laknak Ah A Tli Mi SAC Ralkap 31 Cu India Ram Ah An Zaam
The Chinlandpost | November 28, 2023 — Chin ramkulh, Matupi pengkomh, Lailenpi khua hrambuh ,SAC ralkap cu November 19 ah mipi ralkap he kahdohnak ni 3 a rauh hnu, a nilinak ah a tli mi SAC ralkap 31 cu India ram ah an zaam tiah theih a si.
Lailenpi ralkap sakhan in a tli mi SAC ralkap Captain 1 telh in ralkap 31 cu November 28 ni India ram zing 7:00am ah Myanmar-India ramri Mizoram, Laki Assam Rifle sakhaan an phan cang.
“An mah le mah phone an I chawn, Laki khua um Assam Rifle ralkap sakhan gate ah tuanvo ngeitu hna nih Lailenpi SAC ralkap cu Assam Rifle hna nih Matupi peng Para khua tiang an va don hna” tiah Laki khua mi nih Zalen Media sin ah an chim.
2023 November 24 ahkhan Chin ramkulh, Matupi peng, Lailenpi khua hrambunh ralkap IB 304 kuttang sakhaan cu CNA le CDF nih tlamtling tein an lak khawh cang tiah thawngpang theih a si. Lailenpi hrambunh ralkap sakhaan hi CNA, CDF phufonh nih zaanli tluk an kah hnu November 24 zinglei ah an lak khawh tiah theih a si. Lailenpi khua kahdohnak ah ralkap lei nih kahdohnak vanlawng hmang in ni 4 chung bom a thlak caah khuami 1 an thi, sianginn, biakinn le mipi inn 10 hrawng an rawk tiah theih a si. Sakhaan lak kahdohnak chung ah Ralhrang lei ralbawi tel in minung 4 an thi. CNA/CDF lei in minung 2 hliam an tuar, November 26 ah CNA CDF nih Lailenpi khua cu an hmunhma zohfelnak an tuah tik ah Ralhrang thuhmi meithal hriamngan 5 Machine gun 1, 40mm pahnih, 60mm 1, RPG hna cu an hmuh i an laak chap tiah kan theih. Thlakhat chung ah CNA, CDF nih Chin ramkulh khua pahnihnak an rak lak a si.
About The Author
