Maungdaw Um Pe-ran Tlang Sakhaan AA Nih An Lak
The Chinland Post | 2024 February 20 — Rakhine ram ah kahdohnak pehzulh in a cannak Maungdaw peng, Pe-run tlang sakhaan cu an lak khawh i Sittwe, Ponnagyun, Rathedaung, Ramree, Kyaukphyu, Ann khua hna ah ralkap nih an umnak Defense le Offensive in kahdohnak an tuah tiah AA nih a thanh.
Maungdaw peng, Pe-run tlang um ralkap sakhaan cu February 19 zinglei sml 7:00am thawk in kahdohnak an tuah i sml 9 a rauh hnu zaanlei sml 4:00pm hrawng ah sakhaan an lak khawh.
Kahdohnak chung ah Jet vanlawng nih voi 3 tiang a rak kah i ralkap ruak 10 le hriam, kuanzen le kahdohnak thilri tampi zong an lak khawh.
Sakhaan chung in a sungpe duh lo in a zaam mi pawl zong an dawi hna tiah AA nih an thanh.
Cun Sittwe, Ponnagyun, Rathedaung, Ramree, Kyaukphyu, Ann peng chung um ralkap hna nih Defensive he Offensive he kahdohnak kahdohnak an tuah leng ah hriamngan, van lei hmang in hriamngan an thlah thlorh tiah AA nih a chim.
Sittwe khua hi Rakhine ram cozah nih hram an bunh nak khua a si i Ann khua hi Western Command Headquarters hram an bunhnak a si. Kyaukphyu khua hi Dah-nya-wa-di ti lei ralkap Headquarters a umnak a si i cu khua pawl ah Defensive le Offensive in kahdohnak an tuah tiah AA nih an ruahdamh.
Rakhine ram ah November 13 in AA nih kahdohnak a thawk i thla 3 chung ah Mrauk U, Kyaukdaw, Mebon, Paukdaw, Minbya khua hna leng ah Paletwa zong a lak dih.
February thla hramthawk zong ah SAC ti lei ralkap cu fak lak tein a kah khawh i ralkap tilawng 5 tiang pil lak in an kah khawh i tilawng 4 cu rawk lak in an kah khawh.
About The Author
