Mongmit Um SAC LIB 237 Kahdohnak Ah SAC Ralkap Tampi An Thi, Hriam Zuun 200 Leng An Lak Khawh
The Chinland Post | 2024 March 15 — Kachin ram, Mongmit peng, Dasai SAC LIB 237 sakhaan in hriam tampi an lak khawh tiah Kachin lei kahdohnak thawngzamh nih an langhter.
Mongmit in meng 12 aa hlatnak ah a um mi LIB 237 sakhaan cu KIA nih March 14 chun sml 12:30pm hrawng ah an lak khawh. Cu battalion hi No. 21 MOC tang ah a um mi battalion a si.
“Hriamhme zuun 100 leng kan lak, hriamngan zong a tampi. A zapi zuun 200 leng kan lak khawh. Kuanzen hi cu kan rel cawk lo” tiah Kachin lei kahdohnak lei thawngzamh nih hmanthlak he an langhter.
Adang thawng petu pakhat nih Dasai battalion in an lak khawh mi hriam pawl an langhter ve i cu battalion ah KIA nih an lak mi hriam pawl aa pon kha hmuh khawh a si. Hriam tamlak te an lak khawh leng ah Dasai sakhaan Drone in an thlak lio zong hmuh khawh a si.
KIA phufonh nih March 8 ah Mongmit peng Daw-phung-yan sakhaan an lak khawh.
Cun KIA Headquarters umnak Laiza pawng Bon-re zong ah kahdohnak a fak i SAC nih vanlei kahdohnak a tuah.
Bom-re hi Laiza pawng KIA nih an lak mi sakhaan pawl in ralkap pawl an rak i fonhnak a si i KIA nih March 13 in an kah cang.
Bom-re sakhaan um SAC Brigade 88 Brigadier Commander cu March 13 ah Banmaw khua lei ah a zaam cang tiah KIA lei thawngzamh nih an langhter fawn.
About The Author
