June 22, 2024

South Korea ram, Soul ah ti a lian i minung 8 nak tlawm lo an thi

0

The Chinland Post | 2022 August 10 – South Korea ram, Soul khua ah ti a lian i a thimi 8 nak tlawm lo an um tiah theih a si.

Soul khua inn, lam le tlanglawng kalnak hna ti nih a khuh dih i mei zong a rawk. Cun vawlei a niamnak ah a ummi za leng an tap tiah rianngeitu tu hna nih media ah an chim.

South Korea ramchung kong zung le himnak zung nih a thimi minung 3 hi ti a luhnak vawlei tangah an tap i ti nih a chilh hna caah an thi tiah a chim. Hliam a tuarmi 9 zong mi bawmtu phu nih sizung ah an kalpi hna i minung 7 an tlau rih.

Soul khua ah August 8 thok in ruah a fak i atu bantuk in ti a lianh hi a si. Khua cheukhat hmunhma hna ahcun ruah a tam dan (moe-ye-ching) 442ml tiang a tam. Korea cozah nih ti lianh kong he pehtlai in third level Emergency a thanh cang.

Soul khua ah sml 1 ah ruah a tam dan hi 141.6 ml tiang a phan.

August 9 thok in ti a ṭum cang ko nain bus, mawṭaw pawl ti cungah an vuan i lam an phih. Cozah nih ti a zornak hnga lam le vawlei tang tlanglawng lam pawl a awnh. August 9 tiang vawlei tang tlanglawng lam tampi a pit rih ko.

Han tiva thlanglei hmunhma tampi ah ti a lian khun i mirum pawl an umnak sang zong aa tel. Ti lianh ruangah aa ṭhialkammi 800 leng cu lentecelhnak zung, sianginn hna ah umter chung an si. Soul khua ti a lianh ruangah inn le dawr 700 leng a rawk cikcek tiah media nih an langhter.

South Korea President nih ti lianh ruangah a thimi chungkhar hna sinah ngiaihchiatpinak ca a kuat. President amah pumpak nih ti lianhnak hmunhma ah kal in khawndennak a karhnak hnga lo ka tawlrel lai tiah biakamnak a chim.

Cun, kokek thlichia le ti lianh lei tawlrelnak kha kan remh ṭhan lai tiah a chim. South Korea khuacaan lei zung nih cun August 9-10 tiang Soul khua ah ruah a tam kho i ruah tam dan sml 1 ah 100 ml leng tiang a phan kho tiah a ruahdamh.

About The Author

Na ruahning rak langhter ve.. (Leave a comment)