Chin Mino Hna Nih Cozah Zung Rian Kan Luh A Biapi; Minister Pu Mang Hen Dal
Salai Ngun San Aung| 2018 March 28| Nihin kan ram chung cozah zung kip ti awk ah lutlai deuh miphun dang lawngte an simi hi kan ram thanchonak caah a poi ngaimi le riantuan a harnak a si i hmailei ah kanmah nih kan ram chung zung kip ah lutlai kan si khawh a biapit caah nihin mino hna nih biatak tein cozah zung rian ah an luh awk a si tiah Chin ramkulh Cinthlaknak le Thingram lei Minister Pu Mang Hen Dal nih a chim.
“Kan ram (Chin ramkulh) ah zeidah kan chambau bik ti ah cun rinhchantlak minung kan ngei lo. Cathiam le mifim timi zong tampi an um ko men lai nain Chinmi lakah zumh a tlak i bochan a tlak taktak mi an um lo. Cun nihin kan ramkulh chung zung pawl hi zoh hna hmanh! Lutlai paoh ti awk in miphun dang an si. Hihi kannih zong kan ruah ning bantuk in rian kan tuan khawh lonak a ruang pakhat a si ve. Cun kanmah tluk in miphun dang nih kan ram le miphun thanchonak cu duh nak ngei in an kan ruah piak hrimhrim lai lo. Cucaah mino hna nih biatak tein zung rian ah an luh a herh. Nihin mino tampi cu caan tawi te ca lawng zoh in tangka hmuhnak caah a tha deuh mi NGO rian ah an lut duh deuh, hmailei kan ram le miphun ca tiang ruahchih buin cozah zung ah rian luh cio a bia pi tuk” tiah a chim.
“Cozah zung rian luh cu kan duh tuk ko ta. Pension te zong a um, cozah zung rian tuan kan si ahcun cozah minung kan si tiin kan zawtfah le zeidang kong zongah kan hna a ngam tuk. Asinain mizapi caah cozah zung rian luh hi a fawi te lo. Tangka ting sawmthum, sawmli tiang ziknawh peh khawh lawngah cun pei rian luh khawh cu a si cu. NGO le company tham ahcun rian luh nak ah ziknawh pek a hau lo pi. Thiam nak he aa tlakmi rian ah luh khawh a si” tiah min langhter a duh lomi degree hmuka mino pakhat nih a chim.
Hi bantukin Chin mino hna nih kan ram chung ah cozah zung rian kan luh khawh nak ding duhsah tein ziknawh eihmuar nak hi cozah, biaknak, zatlang bu in a lam kip in kan doh a biapi. Kan ram ah thiamnak he aa tlak ning tein rian luh khawh le tuan khawh a si i kanmah miphun nih zung kip ah rian kan tlaih khawh dih tikah cun kan ram hi a thangcho deuh hrimhrim te ko lai ti kha zumh le ruahchan cio mi cu a si. +++
About The Author
