Hakha Facility Quarantine Chiahmi Hna Dirhmun Biaruahnak

Salai Ngun San Aung| April 25, 2020| Tulio vawlei pi nih buai pimi Covid-19 zawtnak ruangah Hakha zongah khual in a tlungmi pawl cu facility quarantine timi ah minung 60 reng lo an chiah hna I cu chung cun (Nah-tah-lah sianginn) ah chiahmi lakah Paling (Australia Kirmi) le Mai Bawi Dawt Sung(Tuluk Kirmi) cu The Chinland Post nih April 25, 2020 zingah ZOOM in biaruahnak kan ngeih. Cu biaruahnak chungin a chuakmi lakah biaai deuh tete tiah ruahmi a tawifiannak in hika ah kan rak tial than.

Hakha ah Facility Quarantine in an chiah hna nak hi zarhhnih khan a si cang. Nah-tah-lah sianginn ahhin nu (10) le pa (23) an um. Cu chungah biaruahnak kan ngeihmi hna nih an dhimmi cu “zunput le takkholhnak hi an kan hrawmter, nu le pa bel cu a dang tein an kan then. Cun Zunput ah ti a rat lo caah kan dihlak nih tipung pakhat ihrawm in ti than I hman cio a si. Cun Mask hi a thawk ah voikhat an kan pek i cu hnu cu pek a um ti lo. Nizan ah khan kan hal hna tikah cunglei nih mask an in damh piakmi hna a um lo nan duh ahcun nanmah tein a lengah icah uh an kan ti. Cun a kan lengmi le rawl a kan chanmi kan chungkhat ca ah siseh kanmah hman awk zongah kuttawlnak (Handgel) hmanh an kan chiah piak lo” tiah an chim.

Cun cunlei cozah upa zongah an um ka ah voikhat an len hna i mah hnu cu nizan (April 24) ah voikhat an len hna, cu lawng cu a si tiah kan theih. Zatlang bu cawlcanghnak lei a siah biaknak phu lei zongin cakuat, phone ti bantuk zongin thazaang peknak a um lo I mipum in lenkai le chawnhbiak zong a um lo tiah theih a si. Cun April 24 ah State Counsellor Daw Aung San Suu Kyi le ramkulh in riantuantu upa cheukhat he biaruahnak Hakha Sipin Executive Officer U Tam Aung Shing nih a chimmi cu, a dangdang cu an tlam a tling ko, Facility Quarantine kan chiahmi hna minung 60 leng chungah hin 48 hi eidin a harsa deuhmi an si i cu hna cu cozah nih nikhat ah an eidin awk ca 3000 MMK kan pek hna tiah a chim. Cu kong he pehtlai in bia kan ruahmi hna an pahnih te in “tangka hi an kan pe lo. Cun a harsami 48 an timi hi nan harsa maw tiah hal zong kan tong bal lo I zeitindah cazin an lakning a si hnga ti zong kan khuaruah a har ngai tiah an chim. Cun hi Sipin EO pa zong hi voikhat hmanh a mui kan hmu bal lo. Kan chambaumi cu a ho nih an hal hna tik zongah kan sining tein kan chim piak ko hna sehlaw kan duh. Cozah lei upa an rat tik zongah inn chungah lut in kan khuasakning hohmanh nih an kan zoh bal lo. Cu buin zeitnah an tlamtling ko an kan ti khawhning a si hnga, an ti. NIhin zing tiangah khan cun rawl eiman tangka bawmhmi hohmanh an um lo nain nihin zing (April 25) ah nikhat 3000 MMK cio in ni 17 ca bawmhnak an pek hna tiah kan theih. Quarantine ahhin ni 21 um ding a sinain ni 17 ca lawng an pek hna nak a ruang bel cu theih a si rih lo.

Taklinh le linh lo tu cu nifatin te zingzan in hneksaknak an tuah hna i zeidang cumpi tlangrai sual a dam lomi caah pehtlaih ding sii lei riantuantu pahnih phone number zong an pek hna. Eidin kong he pehtlai in cheukhat cu chungkhar zong a tlamtling lo le damlomi zong an um pah len cu bantuk caah zingzan rawlchanh hi a fawi lo ngai. Cucaah minung 100 hmanh a tlinglomi pawl hi cu ramkulh cozah pi caah a hartuk ko hnga maw? Rawlchangh hau lo tein kan zohkhenh kho hna sehlaw kan ilawm tuk ko hnga tiah an chim. Cun an siarem lomi lakah biapi ngai in an chimmi pakhat cu, mithar an chiahmi hna zong kanmah a um ciami he zeipaoh te an hrawm ter hna. Cutikah kan lak ahhin pakhatkhat zawtnak ngei sual usilaw kan dihlak in ichawnh dih a si ko hnga an ti.