Hakha Khuachung Dawr Thilman Kai Ter Sual Mi Upadi Ningin Dantat Ding Ralrin An Pek Hna

TCP-Thantlang|2020 April 9| Atu lio zawtnak kong he pehtlai in Hakha khuachung dawr ngei mi hna nih a kap in thilman kai ter lo ding in dawrthluan kip ah Cozah lei tuanvo ngeitu hna nih zohfel, chimhcawn piak le ralrin peknak an ngeih hna tiah theih a si.

Hi bantuk chimhcawn piaknak cu ramkulh cozah nawlpek nak in dawrthluan kip ah zohfelnak an tuah hi a si. Cu chungah Alhhang(Desel), Hand Gel, Mask le eidin mi dangdang Facang, Pe, Chiti, Cite tibantuk zong a man kai ter lo ding April 8 ni ah zohfelnak le ralrin peknak an ngeih hna hi a si.

“Hi zawtnak ruangah thilman kai lo in a mah ningte si seh ti saduhthah le Dawr ngeitu hna zong nih mizapi cungah dawtnak lungthin he thil an zuarh hna nak ding, le a thilri le a man aa tlak lo tuk in thilman a kai ter mi hna cu Upadi ningin dantat an si lai nak kong, kan chimhchih hna.”tiah ramkulh tuanvo ngeitu zung in U Saw Myint Lwin nih a chim.

March 25 ni ah ramkulh huap in hi zawtnak kongah Chin ram chung in thilman kal ter mi zohfel tu ding le hi kongah tawlrel tu ding Committee phu 3 zong dirh a rak si. Thilman kai ter le kaiter lo zohfelnak chungah upadi ning in dantat mi an um rih lo tiah theih a si. (Ref:hakhaiprd)