Kalay Khuachung Ah SAC Kuttang Pawl Nih Innkhat Hnu Innkhat Chungkhar Cazin A Lak
The Chinland Post | 2024 March 28 – Sagaing ramthen, Kalay khuachung ah SAC nih ralkap tla ding in innkhat hnu innkhat chungkhar cazin a lak tiah Kalay mipi dothlennak committee hruaitu nih Khonuthum Burmese ah a chim.
” Kalaymyo ni chuahlei sang pawl hi an khawmh lio a si, GAD zung he aa naihnak sang pawl, an cawlcangh khawhnak sang pawl, Mingalar dum he aa naihnak sang pawl, Pyusawhti pawl an umnak sang pawl ah innkhat hnu innkhat lut/chuak in chungkhar cazin an lak, cheukhat sang pawl ahcun ralkap tla ding in min cazin an thanh mi pawl zong a um tiah kan theih” tiah Kalaymyo mipi dothlennak committee hruaitu Ko Baik Pu nih Khonuthum Burmse ah a chim.
Sang 20 a umnak Kalay khuachung ah Aungthitsar, Aungmingalar, Nyaungbinthar sang hna ah sanguk bawi, Non CDM pawl nih innkhat hnu innkhat lutchuak in chungkhar cazin an lak hi a si i SAC ralkap pawl nih himnak an lak piak hna.
Kalay khuachung sang cheukhat ah SAC ralkap pawl nih minung cazin le mah sining cazin phitter lo in ralkap tla ding min cazin an thanh mi zong a um tiah thawngpang a len caah an thinphang cio, an fale pawl kha ramdang ah maw an thlah hna lai, dothlennak chung ah dah an luhter hna lai ti kha an lung buai cio” tiah nu upa pakhat nih a chim.
Atu bantuk dirhmun ruang ah Kalay khuachung mino tampi an thinphang tuk cio hna i ramdang le kan pawngkam ram hna ah a zaam mi an tam leng ah dothlennak ah aa tel mi zong an tam tiah theih a si.
About The Author
