Kawl Ralkap Nih An Mahte Design Suaisam Mi Motor 100 An Ser
TCP-Thantlang| 2019 February 27| Kawlram chung a pakhatnak bik mah tein Design suaisam mi motor 100 kan ser khawh cang tiah Senior General Min Aung Hlaing nih a chim.
Pago, Htung-bo ralkap nih ngeihmi sehzung i February 25 ni a va kal ah a tubantuk in a chim hi a si.
“2016 kum ah hi sehzung cu ralkap kut cung in pekchanh a rak si hnu caan tlawmpal ah riantuan rak i dinh a si nain a tu ah cun motor serchuahnak rian thok a si bantuk in kanmah tein Design suaisam mi motor 100 zong chuah a si cang caah lunglawmh awk ngai a si” tiah sehzung riantuantu hna sin ah a chim.
Ralkap nih ngeihmi a tu sehzung (a thaphun) cu a hlan lio ah No.(2) sehhmuh vuanci nih tuanvo lak in Mazada Jeep, B-600, T-2000 motor phun pawl an rak serchuah bal i 2016 kum ah Ralkap sin an pekchanh hna hnu zongah pehzulh in tuanchuah kan i tim rih. Cun 2019 tangka kum chung ah INLAY Jeep motor 200 chuah kho ding le pehzulh in motor 1000 tiang chuah dingin timhtuahnak an ngeihnak kong ralkap lutlai zung pi thawngthanh ca nih a langhter.
Sehzung hmanmi sehthilri hna cu 1964-1978 kum lio Japan nih chuahmi OSAKA KOSAKUSHO, HITACHI SEIKI, MITSUBISHI, OKUMA, SHOUN, OKK, SEIKOSHA, ROKU ROKU SANGVO, YOSHIDA, TOKUSHU KOKI SEISA KUSHO, TSOGAMI, TOYOKOGVO timi seh thilri a hlunmi pawl tharchuah in motor Engine le seh thilri dangdang hna ah hman in an ser tiah kan theih.
Ref: DVB
About The Author
