Myanmar ram buainak kong ICC ah kuat colhding in Fortify Rights nih a hal
The Chinland Post | 2022 June 9 – Kawl ralkap nih Rohingya miphun hna cu ṭha tein in an miphun ning in an ci a hloh khawhnak hnga rammi a si le si lo check khawhnak card (NVC) a chuahpiak hna tiah Fortify Rights phu nih June 8 ah an thanh.
Mahhi vawlei ralpi 2 nak lio chungah Jew miphun pawl a phuphu in meikhanghnak, 1994 Rwanda ramchung ral lioah Tutsi miphun hna a phuphu in thah an tonnak bantuk in Kawl ralkap nih ṭha tein le a khat tein a tuah tiah a chim.
NVC card chungah Rohingya tinak zawn ah Bengali tiah a langhter i miphun pakhat a si komi kha ṭha tein a ṭhen hna i hrawh a timh hna tiah an report ah an langhter.
Nazi cozah nih miphun sinak card a rak chuahpiak hna i Jew miphun cu a rak thah bantuk in Rwanda thahnak zongah Tutsi miphun pawl cu NVC card kha hmang in a thah hna. Cubantuk he aa khat tein Rohingya pawl zong an ing ve tiah Fortify Rights phu nih a chim.
UN Security Council nih Myanmar ram buainak kong hi ICC ah kuat colh ding in Fortify Rights phu nih an report ah halnak an tuah chih.
UN chungtel ram hna nih SAC cohlan loding le hriam le tangka an ngah khawhnak lam poah chahpiak ding in a hal fawn.
UN le ASEAN nih NUG cozah he pehtlai in bawmhnak pek ding zong Fortify Rights phu report ah hmuh khawh a si.
About The Author
